Ang duha ka bunga sa Simbahan

Malaumon ang simbahang Katoliko sa Sugbo nga mahatagan kini og katumanan karong tuiga ugaling maaprobahan sa Vatican ang pagbahin sa Archdiocese sa Sugbo ngadto sa tulo ka tulo diin mosanga ug laing duha ka diocese sa dakbayan sa Danao sa amihanang Sugbo ug dakbayan sa Carcar sa Habagatang Sugbo.

Suportado sa hugpong sa mga layko ang maong lakang human usab mihimo og konsultasyon ang hugpong ngadto sa katawhan diin nakakalap sila sa hiniusang pamahayag nga gisumiter nila mismo ni Cebu Archbishop Jose Palma ug iapil kini sa mga dokumento nga dad-on sa arsobispo ngadto sa Vatican sunod buwan.

Ang Sugbuswak gikan sa pulong nga Sugbo ug ang buswak nagpasabot nga blossom o pagpamuwak nga mosangpot sa pagpamunga ug ang bunga mao na kini karon ang duha ka diocese nga umolon gawas main archdiocese nga kasamtangang nahimutang sa dakbayan sa Sugbo.

Sa sinugdanan nabahin ang baruganan sa mga Sugboanon kay mura g negatibo man paminawon ang Sugboswak kon dili sabton nga murag Sugboak kaniadto nga tinguhang buakon ang Cebu.

Apan kining gihimo sa simbahan dili man pagbuak kon dili panahon sa pag ani na sa bunga nga gitisok sa Simbahan alang usab sa mas haduol ug epektibong serbisyo sa mga tawo.

Dili man gyud malikayan nga adunay kausaban nga mahitabo nga dili dayon madawat sa uban kay wala man maanad nga gustong ipreserbar ang naandan apan sa kadako ug ka luag sa Archdiocese sa Sugbo gikinahanglan nga palamboon ang nigitib nga sipak o binhi.

Anaa ra man gihapon ang inahan nga Archdiocese nga motan-aw ug motabang sa duha ka mahimugso nga diocese hangtud nga makabarug na nga sila ra.

Ang tinguhang Sugboswak dili lang tingog sa mga pari kon dili naapil ang tingog sa mga layko nga gihangop mismo ni Arsobispo Palma ug ingon usab niini ang gibati sa mga layko nga gihatagan og gibug-aton ang ilang partisipasyon.

Kong unsa ang makaayo sa kinabag-an angayan nga hatagan og kahigayonan nga mapamatod-ang bili inig abot sa panahon.

Karon na ang panahon nga ipalipang ug ipaduol ngadto sa katawhan ang simbahan, unta dili lang kutob sa pagbuswak kon dili mahinog ug maani ang bunga alang sa tanan.