Wa taktaka, nibiya si Yogi
Andam ang Sugboanon nga kanhi customs commissioner nga si Yogi Filemon Ruiz sa pag-atubang sa imbestigasyon sa Senate Blue Ribbon Committee sa duha ka mahalon nga sports cars nga gikataho nga nakasud sa nasud nga wa mobayad sa sakto nga buhis.
Sa among panagsulti niadtong Martes sa gabii, nipadayag og pagtuo si Ruiz nga nahimo ang importasyon sa Bugatti Chiron human sa iyang pagbiya sa Bureau of Customs (BOC) niadtong Pebrero 2023 pero giduhig ang iyang ngan aron pagtabon sa responsibilidad sa mga opisyal nga wa makatuman sa ilang trabaho.
* * *
Kon tinuod nga dungan nga narehistro ang duha ka Bugatti Chiron sa Land Transportation Office (LTO) sa Mayo 30, 2023, nangagpas si Ruiz nga na-import ang mga sakyanan sa samang buwan. Kay ang importers mopa-rehistro dayon sa mga sakyanan sud lang sa 20 ka adlaw human na-release sa BOC.
Nipasabot si Ruiz nga lisod pagtago ang sakyanan nga sama kamahalon sa Chiron (gibanabanang tag P168 milyones kada usa) kon tinuod nga nidunggo ang mga sakyanan sa pantalan sa Batangas sa Disyembre 2022, lima ka buwan sa wa pang rehistrasyon.
* * *
Nagduda si Ruiz nga dunay naghatag og sayop nga kasayuran ni Senador Raffy Tulfo nga luag ang importasyon sa mga sakyanan ubos sa iyang pagduma aron pagduot niya. Matod ni Ruiz ang ebidensiya sa iyang ka-istrikto mao ang pagsulbong sa koleksiyon sa BOC atol sa pito ka buwan niyang administrasyon.
Niangkon si Ruiz nga di niya masubli ang tanang importasyon kay sa 16,000 ka containers nga modunggo sa mga pantalan ang ipahibawo niya mao rang mga kargamento nga dunay alarma.
* * *
Matod ni Ruiz wa siya taktaka ni Presidente Ferdinand Marcos Jr. Nibiya tungod sa problema sa kahimsog (usa ka oras na lay kinatulgan) kay nahasol sa grupong nasuko sa iyang pag-digitize sa tanang transaksiyon nga makabadlong sa palusot.
Sa way paghingan og mga ngan, niingon si Ruiz nga labihan kahawod sa grupo nga bisan 10 pa ka presidente di makadupa niya gikan sa ilang sabotahe. Nananghid sa presidente, nga iyang giingong mapanagan-on nga nisugot, nga mo-resign siya. Ambot tungod ba sa kontrobersiya, daghang nipahalipay niya sa huhungihong sa niaging duha ka semana nga ibalik siya sa BOC.
* * *
- Latest
