Kwaresma na usab

Karong adlawa mao na ang pormal nga sinugdanan sa Santos nga Kwaresma. Gitawag kini og Miyerkules sa Badlis.

Ang mga abo nga gigamit nato sa niaging semana santa ang pagasunogon ug ang abo niini mao ang atong gigamit karon.  Dunay duruha ka mga pilianan nga mga pulong.

Ang una, magkanayon: “Hinumdomi tawo nga sa abog ka gikan ug sa abog ka pauli.” Ang ikaduha: Paghinulsol ug tuo sa Ebanghelyo.

Nagpahinumdom kini nga sa atong panaw sa kinabuhi angayan natong dawaton nga kita mamatay gayud. Tungod niini wala kitay angayan nga ikapanghambog.

Ania ang sukaranan sa Bibliya kalabot sa kwaresma

1.  Kini tungod kay higayon sa espirituhanong paglimpiyo. “Pito ka adlaw gikan karon magdpadala ako og ulan sa kalibutan sulod sa kap-atan ka adlaw ug gabii ug akong laglagon ang tanang mga buhing linalang.” (Gn. 4;7)

2.  Kini ang higayon sa espirituhanong pagsulay. “Ug si Moises mitungas sa bukid ug nagpabilin siya didto sulod sa kap-atan ka adlaw ug gabii. “ (Ex. 24:18)

3.  Kini ang panahon sa espirituhanong pagkastigo. (Num. 14;33)

4. Kini ang panahon sa espirituhanong pagpangandam (1 Hari 19;8).

Ang pagpanton sa atong lawasnong kahilig ingon man ang pagkamapaubsanon diha sa atong pagpangayo og pasaylo dako man og ikatabang alang sa taliabot nga triduo paschal nga kasaulogan.

Ang Abstinensiya nagpasabot man nga kinahanglan nga atong himoon ang pagpugong sa naandan alang sa mas makahuloganaon nga tumong.

Ang pagpuasa pagpakita man sa atong tim-os nga pagpangayo sa kapasayloan sa atong mga sala.

Nunot niini usab ang paghimo sa mga buhat sa kaluoy alang kanila nga mas nagkinahanglan pa kay kanato.