Mindanao mobuwag notang nayabag

Usahay, kon moawas na ang kataas sa pailob ug modahili ang nagbukalbukal nga kasuko, luoy kaayo ang mga kabahin sa gawas nga gidahilian sa makapasong kainit.

Sama sa gibuhiang bahad ni kanhi Presidente Rodrigo Roa Duterte (PRRD).

Nga basin mapugos pagbulag ang tibuok Mindanao gikan sa Republika sa Pilipinas tungod niining makadismayang pagpamunoan ni Pangulo Bongbong Marcos.

Daghan ang gisakitan niini. Ug kinsa bay dili? Dili ba hasta pila na ka higayon ato siya nakit-ang mihawok sa bandera sa Pilipinas dungan ang pag-ingon:  I love you, all Filipinos and my country?  Unya, nganong moingon man siyang mobulag na silang taga Mindanao?

Angay hinumdoman. Atong bandera adunay tulo ka bituon nga naglangkob sa kahiusahan sa Luzon, Visayas ug Mindanao. Daghang nasud ang gustong moulipon natong mga tabunon.

Apan tungod sa kaisog sa atong mga bayani, kinsa walay kukahinugong mipabanaw-buhis sa ilang dugo, atong naangkon ang hingpit kagawasan.

Busa, kon unsay ilang gibilin kanato, dapat ampingan nga walay bisan usang mahimulag. Kay alang kanako, ang pagbungkag sa unsay gihiusa sa atong mga bayani, usa ka dakong pagbudhi.

Sa mga eskuylahan ug buhatan sa gobiyerno, sayo sa buntag, labi nag Lunes, anaa g'yoy flag ceremony. Hawot kaayo paminawon ang matag nota gikan sa pagsugod hangtod sa kataposang mga linya sa atong Nasudnong Awit:  Aming ligaya na pag may mang-aapi. Ang mamatay nang dahil sa iyo.

Wala gyod moingon atong mga bayani nga bulagon ang Mindanao ingkaso'g anaay sungayang linalang nga modaogdaog sa atong nasud ug sa iyang katawhan.

Kondili, angay pakamatyan sa higayong adunay nagtinguhang mopasipala-laksi sa bisan unsa mang kabahin nga iyaha sa atong yutang natawhan.

Unya karon nga namatud-an mismo ni PRRD kining garapalang dinad-an nila ni first lady Liza ug House Speaker Martin, nganong Mindanao ra man ang gusto niyang luwason? Nganong dili man niya iapil ang tibuok Pilipinas? Nahadlok ba siya nila Liza-Martin?

Dapat ang iyang kahadlokan mao ang pagbulag sa Mindanao gikan sa Republika sa Pilipinas. Kay sama rang giyabag niya ang mga nota sa atong Lupang Hinirang ug mihimo niining sintunado.

Ang Mindanao kabahin ra sa Pilipinas. Kon may usbong balaod, katungod sa tanang Pinoy ang pagpanggilabot. Busa, angay irespeto!