Ang gift of tongue

Sa bata pa ako kuyogkuyogon gyud ko sa akong Lola Delfina sa bisan asa nga prayer meetings. Mga mid 80s kusog kaayo ang CCRM kun ang Catholic Charismatic Renewal Movement.

Sa maong mga prayer meetings ang tanan magsugod gyud og mga praising nga pagaubanan sa gitawag nilang glossolalia kun speaking in tongues. Mao gihapon kini ang set up hangtud na sa higayon nga gipaapil kami sa LSS Seminar sa wala pa kami ma ordinahi. Anaa gihapon ang speaking in tongues.

Ang speaking in tongues, dili man mao lang ang gasa gikan sa Espiritu Santo. Adunay lain pang mga gasa.

Aduna pay laing mga gasa. Dili lang kini ang angayang pahimug-atan. Kay usahay man gud dili man gyud pinulongan ang ipunay og yawit ning uban.

Ang nahitabo man gud mao nga ilang yawyawon ang mga “mumblings” kun mga yawyaw nga dili termino nga sa ato pa, walay kahulogan.

Sa laing bahin, kun ugaling litokon kini adunay tukmang makahubad niini. Nga sa ato pa, matuod nga pinulongan ang gilitok ug dili lang mumblings.

Labaw sa tanan, dili kini angayan bansayon sa wala pa ang prayer meeting.  Pun-an pa sa mga tukar nga nakapadugang sa sensasyon.

Pun-an pa sa gitawag nilang slain by the spirit. Mao kini ang praising nga pinasikad sa emosyon.

Ang Dios dili Dios sa kalibog. Dios siya sa han-ay. Nianhi ug nakigpuyo siya uban kanato aron ang Diosnong Mensahe mas masabtan ginamit ang tawhanong pinulongan.

Mas maayo nga daygon nato ang Dios sa paagi nga atong masabtan ug sa higayon nga kita makasabot, mas atong mahigugma ang atong gisaulog.

Bisan pa man kun sa atong pamati misteryoso ang bisan unsang pulong nga dili hisabtan, apan angayan natong hinumdoman nga mas makahuloganon gyud ang mga pulong gilitok uban ang giya sa simbahan.