Cocaine gihapos, fentanyl gibawos

Sa Davao City Candlelight Prayer Rally, giklaro ni kanhi Presidente Rodrigo Roa Duterte (PRRD), dili sila kaaway sa mga Marcos. Sila kinasingkasing-nagmatinud-anon pag-alagad sa katawhan alang sa kaayohan sa atong nasud ug nganong kontra man kaayo sa mga Marcos-Araneta-Romualez ang mga Duterte? Usab, gikadismaya ni PRRD ang People’s Initiative for Charter change, diin wala ipaagi sa hustong proseso ug nasayrang gipamalit ang matag pirma sa giilad-gihadlok tang kaigsuonan. Hinungdan, sa tarpaulin ug T-shirt sa mga nanambong nakatatak: “Dabaweniyos are not for sale.”

Sa maong rally hasta kapila gipalanog ni PRRD nga si Presidente Bongbong Marcos (PBBM) bangag. Adik! Mahilig sa cocaine. Diin, dapat hatagag pulidong pamahayag nga makatangtang ning mahugawng pasangil.

Tuod, atubangan sa reporters, siya mi-counter: “Fentanyl. Kinakusogang painkiller nga imong mapalit. Grabe makaadik. Grabig side effects. Lima ngadto unom ka tuig migamit si Duterte niini. Maong siya naingon niana. Unta, matan-aw siya sa mga doktor aron matagad kining maong suliran.”

May pagka-below the belt kining gibuhiang tira ni PBBM. Sanglit, ang fentanyl nga giusar ni PRRD may prescription man sa iyang doktor dihang naaksidente siya. Panghaklap ra sa lawas ang fentanyl aron mahanaw ang sobrang pagpanakit sa kalawasan sa pasyente. Diin, sa pagkaalim ni PRRD, wala na siya mogamit niini. Legal kini. Mapalit sa mga botika.

Samtang ang cocaine legal ba, aduna bay doctor’s prescription ug lantarang gibaligya sa mga botika? Dinhi pa lang, standing knock out na si PBBM sa gipasangil-hapos ni PRRD sa iyang nagubang nawong nga makitang miginhawa unag halawom, nakapanghupaw ug daw mitibi, ayha pa nakatubag sa mga reporter nga midumog-interview kaniya.

Cocaine ang gihapos ni PRRD kaniya, Unya, fentanyl ray iyang gibawos? Ay, naku! Basin bayag malup-og lang siyag samot?  Unta, ipruweba ni PBBM sa lehitimong paagi nga dili siya adik?

Ug kon iya nang mapruyba nga tumotumo lang ang gibandilyo ni PRRD, hala, ikiha, ipadakop ug ipabilanggo kining tawo, kinsa tungod sa iyang pagmahal sa katawhang gibinaboy sa pag-atratar sa first lady ug ig-agaw nga House speaker ni PBBM, nagplano nga silang tanang taga Mindanao mobulag na sa Republika sa Pilipinas.

PBBM, ikaw ra gyoy makasulbad niining tanan. Oh, Lord, save us!