EDITORYAL - Anti-Wangwang Policy, naa pa ba?

Kani mga convoys nga magsakay og mga VIP nga vans may pagtugot ba? Kinsa may mopara ani nila para sutaon kun kinsa ang mga sakay aning mga convoys ug kun otorisado ba sila nga magpaka-espesyal sa kadalanan.

Niadtong panahon ni anhing presidente Benigno “Noynoy” Aquino usa sa mga una niyang kamandoan ang hugot pagpatuman sa “No Wang Wang” policy.

Gibawalan ang tanang mga politiko, apil iyang gabinete,  pribadong mga tawo , mga ahensiya sa gobiyerno nga wala magkinahanglan niini sa pagbutang og blinkers, sirens ug uban pang gadgets sama niini gawas lamang sa mga sakyanan sa AFP, BFP, NBI, PNP, mga emergency vehicles sama sa mga ambulansiya.

Siya mismo mipakita nga No. 1 nga mituman niini  subay sa iyang “Daang Matuwid” nga polisiya. Gidid-an niya ang Presidential Security Group (PSG) nga mogamit og wang-wang sa presidential convoys, pagpakita sab kini sa iyang panaad nga ang katawhan maoy iyang agalon o “Kayo ang Boss ko.”

SiAquino o P.Noy, miingon nga si kinsa man ning mga politiko para maghari-hari sa karsada ug hikawan sa agianan ang mga magbubuhis?

Ang Anti-Wangwang Policy nagagikan pa sa panahon ni kanhi diktador Ferdinand Marcos Sr. nga mipagawas og Presidential Decree No. 96 nga nagdili sa mga sibilyan, bisan mga politiko, ug uban pa nga magbutang aning siren, blinkers gawas lang sa mga nahisgutang law enforcement agencies ug emergency vehicles sa gobiyerno.

Apan nabantayan sugod sa panahon sa administrasyong Duterte nga nibalik na sab kining mga vans nga tinted ang mga samin  nga naghari sa karsada.

Duna silay magkidlap-kidlap nga suga sa sud o blinkers, ug usahay mo-wang wang kun dunay makaali sa ilang atubangan apan  dili red plates ang vans, walay police escort, kinsa man diay ni sila?

Sila na bay “boss” karon?

Ning bag-ohay lang, dunay hit and run nga nahitabo diha sa dalan duol sa Redemptorist Church sa Barangay Camputhaw Cebu City, usa ka motoristang basketball player ang nakalas.

 Dunay mga nakasaksi nga ang nakadasmag niya convoys sa mga sakyanang nag-blinkers. Ang mga otoridad naghimo na og imbestigasyon kabahin sa hitabo lakip ang pag-ila kun kinsa ang sakay sa maong convoy.