Kun itandi mo na ang imong kaugalingon

Duna toy gidala ngari nako batan-ong babaye. Bag-o pa lang gyud nihuman sa iyang kurso.

Apan gumikan sa kanihit sa kahigayonan dinhi sa ato, nitrabaho siya sa trabaho nga walay labot sa iyang kurso. Kining maong batan-on ikaduha sa tulo ka mga anak sa iyang ginikanan.

Sa iyang gitrabahoan, anaa ang pressure gumikan sa mga bulohaton. Pun-an pa nga layo ang pansayan labina kun dunay sugo sa lawas. Pugong pugongan pa gyud niya tungod kay usahay maatlan nga daghan ang mga customers.

Mao nga dili pa lang dugay nahimo siyang luya ug walay kadasig makadungog siya nga dunay mohunghong niya nga magkanayon: “Pahuway na! Pahuway na! tingali kadto ang gisinggit sa iyang kahiladman nga kinahanglan una niyang mohunong aron makabaton og igong kusog kini tungod kay stressful ang iyang kinabuhi.

Pun-an pa sa mga pulong nadungog gikan sa mga tawong nagpalibot kaniya nga halos negatibo ug walay ayo.

Lisud dawaton apan gitandi siya sa uban. Nahanaw ang sense of appreciation ug affirmation alang kaniya. Makatabang baya pud kini sa pag-isa sa imong morale. Lisud na kun kaugalingon na gyud nato ang maningil. Lisud na kun ang atong tanlag na gyud mismo ang mosudya kanato.

Sa mga panghitabo sa atong palibot atong nakita nga ang matag tawo hilig gyud og pagtandi. Mas mouyon kita ug mosunod sa mga sikat. Wala nato iapil sa atong kwenta kadtong mga tawo nga anaa sa mga hilit nga dapit sa atong katilingban.

Wala nato hatagi og igong pagtagad kadtong mga yanong paningkamot sanglit naka pokus man kita sa mga dinagko.

Atong nakalimtan nga dunay kaambong diha sa kahilom ug kahilit. Kay diha sa kahilom anaa ang Dios. Butang nga usahay atong gihikaw sa atong kahilom sanglit nahadlok man kita sa kahilom.

Dili na kinahanglang itandi nato ang atong kaugalingon ngadto sa uban. Aduna kitay bili sa mga mata sa Dios. Ang yawa kanunay nga mohulhog kanato nga atong ipataas ang atong kaugalingon diha sa kompetisyon.