Nadisgrasya sa social media

Duha managsoon nga nag-edad og onse ug trese anyos sa usa sa mga barangay sa syudad sa Naga ang nadisgrasya ang pagkababaye sa duha usab ka mga lalaki nga ilang gikaila pinaagi ra usab social media. Nadakpan hinuon ang mga suspek nga nag edad usab og 18 ug 19 anyos kinsa nagtingkagol na sa bilanggoan.

Nahitabo ang krimen niadtong gabii sa Domingo sa baybayon diin nagkita ang mga bata ug ang mga lalaki nga ilang gikaila sa Facebook ug didto nahitabo gyud ang dili angayan nga mahitabo.

 Matud sa duha ka mga suspek nga wala nila pugsa ang mga babaye kay aduna kuno silay relasyon ug sinabotan nila ang tanan.

Unang nakaila sila sa Facebook hangtud nga nag chat chat ug nakauyab hangtud nga nakahukom nga magkita.

Tungod sa kainit sa ilang gibati ug nadala sila wala na nila damha nga nakahimo sila sa butang nga nakaguba sa ilang kinabuhi, pareho sa mga suspek ug mga biktima.

Bisan pa og nagkauyab sila ug sinabotan ang nahitabo kanila apan mga bata pa man intawon ang mga babaye busa dili gyud makalingkawas ang mga lalaki sa ilang gibuhat, malata gyud sila sa bilanggoan kon mapamatod-an nga sad-an sa korte. Ang ginikanan sa mga biktima desido man gyud nga ipasaka ang kaso batok sa duha ka mga lalaki.

Giadto nako ang balay niining mga biktima, hilabihan pud ka lisod ang ilang kinabuhi ug didto ra mag-internet ang mga bata sa ilang silingan ug dili man pud daw badlongon kining mga bataa matud sa ilang inahan maong nakurat sila sa nahitabo.

Giangkon sa inahan nga aduna siyay pagkuwang sa pagmonitor sa kalihokan sa iyang mga anak apan gipasabot niini nga gikinahanglan niyang motrabaho aron sila mabuhi.

Buwag diay kini sa iyang bana ug aduna na silay tagsatagsa ka pamilya.

Kong dili gani ma-manage og maayo ang mga batan-on karon mohimo gyud sila og mga butang nga sa kauwahian ilang mahayan busa tutokan gyud ang pag giya kanila aron dili mahitumpawak sa kaalautan.

Daghan na ang mga panghitabo nga sama niini nga nagsugod lang sa social media.

Daghan kaayo nga mga dautan ang nagtambay lang sa social nga naghuwat nga makabingwit sa ilang mabiktima.