Sinulog 2025 sa SRP gihapon

Dili man perpekto ang bag-ohay nga nahuman nga Sinulog Festival 2024 apan makaingon ko dako ang paglambo niini itandi sa Sinulog sa nakalabay'ng tuig, hapsay ug nagmalamposon inubanan sa kooperasyon sa tanang mga stakeholders apil na ang mga frontliners sa pagpatuman sa kahapsay ug kalinaw.

Atong pahalipayan ang mga nagdumala sa Sinulog sa Sugbo Philippines 2024.

Adunay mga pagsaway nga nitumaw gikan sa mga tawo nga wala makauyon sa venue kay lagi alang kanila dili haum ang dapit sanglit hilabihan ka init sa panahon ug layo sa kabihasnan ang SRP nga walay kapasilongan sa mga tawong manan-aw.

Dili man kalikayan kining mga reklamo kay katungod man usab na nila. Uwan ug init ang panahon pareho ra gihapon ang pagsaway nga motumaw, ang importante nga walay dagkong palpak nga nahitabo, kong aduna man gamay ra seguro ug maoy han-ayon nga dili na masubli sa mosunod pa nga mga selebrasyon.

Angayan nga dawaton nalang ang kamatuoran nga mao na kini ang dapit nga haum sa Sinulog tungod sa kadaghan sa mga tawo nga maigo gyud sa luag nga wanang sa SRP.

Panahon na nga mag move on na ug ablihan ang mga mata ug pagbati nga sa bag-ong dapit na ang Sinulog venue kay kong dili magsige nalang gyud kita og lingi sa Abellana Sports Center. Samtang si Mayor Mike Rama pa ang mayor aw mao na gyud ni ang mahitabo kay maliso pa ang buko sa kawayan kay sa mausab ang iyang hukom.

The more nga sigehan og saway ang mayor mosamot hinuon ka gahi ang iyang baruganan nga siya ang masunod kay siya man ang mayor.

Karon pa lang fixed na ang iyang desisyon nga sa SRP gihapon ipahigayon ang Sinulog sa tuig 2025 ug iyang giulohan nga Sinulog sa Sugbo Philippines One Cebu Island still ug ang tema niini pang tibuok kalibutan. Karon pa lang nakiglambigit na siya sa ubang mga lalawigan ug mga rehiyon nga mosalmot sa kalihokan sunod tuig ilabi na kadtong mga nabantog kaniadto sa Sinulog dancing contingents nga gikan sa ubang dapit.

Kong sa SRP na gyud ang venue sa Sinulog, unta karon pa lang trabahoon na daan ang area dili kay inig abot na pud sa December hangtud enero magtrabaho nga maoy makaingon sa pagsilaob sa mga pagsaway sa mga wala makagusto niining dapita.

Pamatud-an sa LGU nga seryoso sila sa ilang desisyon pinaagi paghapsay ug paghan-ay nang daan niining lugara aron wala nay ikabato nga pagsaway ang mga kritiko.