Piyesta Senyor

Labing klarong ebidensiya nga pulos pagarpar ang mga pasidungog sa mga politiko sa Sugbo ug sa nasud sa Balaang Bata nga gipahinungdan sa Piyesta Senyor gahapon ug giilang patron sa tibuok nasud: Atol sa tibuok adlaw nilang kiat-kiat sa piyesta gahapon, 95 ka bata sa Pilipinas ang nangamatay tungod sa malnutrisyon.

Kanang numeroha wa maggikan sa tumoy sa among buhok. Kon dili sa Unicef (United Nations International Children's Emergency Fund). Nga gibase sa opisyal nga mga dokumento sa National Nutrition Council (NNC) ug sa ubang mga ahensiya sa gobyerno.

* * *

Gikan sa Sugbo, ang pinuy-anan ni Sr. Sto. Niño, ang dakong bahin sa mga bata nga nangamatay kada adlaw kay way saktong pagkaon, maong nangasawot ang pagtubo ug paglambo sa ilang utok ug nagsige og kasakit. Ang labing dato nga mga syudad sa Sugbo maoy giila sa NNC sa Central Visayas nga apil sa labing daghan og mga bata nga wa pay 5 anyos nga nag-antos sa malnutrisyon:

· Sa Cebu City, 6.96% ang malnourished;

· Sa Mandaue City, 5.46% ang malnourished; ug

· Sa Lapu-Lapu City, 2.32% ang malnourished.

* * *

Mas makapa-alarma ang malnutrisyon sa mga bata sa Probinsiya sa Sugbo, nga sa nangaging katuigan maoy gideklarar nga labing dato sa Pilipinas. Tulo ka lungsod sa Sugbo ang naghupot sa labing taas nga ang-ang sa malnutrisyon sa tibuok rehiyon:

· Sa Ginatilan, 29.47%, o 277 ka bata ang nangasawot tungod sa malnutrisyon;

· Sa Alcantara, 24.68%, o 269 ka bata ang nangasawot tungod sa malnutrisyon; ug

· Sa Alegria, 24.82 percent, o 566 ka bata ang nangasawot tungod sa malnutrisyon.

* * *

Angay ng mauwaw ang mga politiko sa ilang ulog-ulog nga yukbo ni Sr. Sto. Niño. Kon napakyas pag-atiman sa labing batakan nga panginahanglan sa sakto nga pagkaon sa mga bata, unsa pa ang mga pangalagad nga wa nila ikahatag ngadto sa katawhan?

Ang pait nga kamatuoran mao nga samtang nisalida sa ilang pagsayaw isip pangaliya sa Balaang Bata, gibusdik ang ilang mga bolsa sa buhis sa katawhan. Maong nahikawan ang kinabag-an sa dinaliang ayuda sa kalisod, alibyo sa gimaniobrang presyo sa palaliton ug patas nga kahigayonan sa panginabuhi. Maong padayon nga nisulbong ang malnutrisyon.

* * *

[email protected]