Magbinantayon kita

Dili pa lang dugay naukay ang mga parokya sa among distrito tungod sa gipahigayong misa ug deliverance sa usa ka pundok nga ginganlan og Apostolic Catholic Church.

Nahitabo ang maong insidente didto sa Badian. Niadtong dekada ‘70 ang Apostolic Catholic Church nahimong  kabahin gyud unta sa Romano Katoliko nga Simbahan.

Tinukod kini ni Maria Virginia P. Leonzon Vda. De Teruel didto sa Hermosa, Bataan.

Niadtong tuig 1991 pormal silang nibuwag sa Romano Katoliko ug tungod sa mga nagkadaiyang mga isyu tungod niini pagatawgon silang mga schismatics. Wala nila dawta ang gahum sa Santo Papa sa Roma nga maoy point of unity sa Simbahang Katoliko. Si John Florentine Teruel gikonsagrahan ingon nga Patriyarka iyang gi rehistro ang simbahan ngadto sa kahugpongan sa mga protestante ug sa mga Independent Catholic Denominations nga hawa sa Communion sa Roman Catholic Church.

Namatay siya niadtong Enero 19, 2021. Nihulip sa iyang dapit mao si Juan Almario.

Doktrina

Aduna silay gitawag nga Sacrament of Holy Sealing nga mao ang bunyag sa sa Kalayo ug Espiritu. Ilang gituohan nga ang ikatulong persona sa Santisima Trinidad nibuot nga pagatawgon siyang Ingkong ug kini gipadayag dinhi sa Pilipinas pinaagi ni Maria de Teruel.

Ang mga miyembro nila pagatawgon og Apo kun tinatakan.

Sanglit dili man sila usa ug kauban nato dili mamahimong applicable ang ilang mga pagtulon-an ug mga balansayon alang nato.

Mahinungdanon kaayo nga magmatngon kita kay dili tanang nakahabito pagatawgon nga mga pari.

Adunay uban nga buot mokopya sa atong mga pamaagi tungod sa linaing mga katuyoan. Dili pud kita obligado nga mohatag tungod kay dili man kita nila sakop ug wala pud silay natampo kanato.

Pag-amping