EDITORYAL - Overpricing sa parkingan
![EDITORYAL - Overpricing sa parkingan](https://media.philstar.com/photos/2024/01/18/1_2024-01-18_23-57-11.jpg)
Grabe ang pangwarta aning mga establisamentong dunay mga lugar nga mamahimong maparkingan og sakyanan, apan kinahanglang mobayad ang moparking. Maayo lang og makatarunganon ang presyo, dili ra ba. Usa sa problema karon sa mga deboto sa Senyor Sto. Niño nga nagdala og sakyanan nga gustong mosimba diha sa Basilica Minore del Sto. Niño mao ang parkingan.
Maayo nalang nga si Cebu City Mayor Michael Rama mimando nga tugotan na ang mga tawong nagdala og sakyanan nga maka-parking duol sa Basilica. Bag-o kini, kay kaniadto bawal gyud mag-parking sa palibot sa Basilica panahon sa Novena Mass.
Karon daghan ang nalipay kay pwerteng daghanang mga dunay bakanteng espasyo sa ilang establisamento o bisan pribadong compound duol sa Basilica ang nidawat og mga gustong mo-parking bugti sa bayad. Apan daghan kanila ang namintaha kay grabe kamahal sa ilang pangayong parking fees, wala pa gyuy resibo. Ang uban nga walay kwarta mabalaw og tuyok-tuyok pagpangita og maparkingan nga libre, maayo nalang nga gihimo kini sa mayor.
Dili lang si Rama ang nakadungog og reklamo bahin aning parking fees nga nagpalabi og pamahal, nahitabo sab kini didto sa Lapu-Lapu City nga layo sa basilica.
Si Mayor Junard “Ahong”Chan sa iyang post sa Facebook mi-react aning mga nadawat niyang reklamo bahin aning overpricing sa parking fees diha sa Marigondon Beach o Mar Beach nga usa ka public beach sa siyudad.
Bisan public beach kini, daghang mga gipangtukod nga cottages diha ug mga parentahang lamesa ug mga bangko. Wala ra man untay reklamo nga manggawas kondili pa nag-overpricing ning uban, ang singil nila sa motor P100, samtang sa sakyanan P150 ngadto sa P250. Mahal pa sa parkingan sa mga dagkong malls sa Cebu City, wala ra bay resibo.
Ang mga tawong gustong maligo bisan motusmaw ra og kadiyot sa dagat gusto gyud pabayron sa parking ug duna pay uban pugson gyud nga kinahanglan gyud silang morenta og cottage o lamesa kay di kuno mosugot ang tag-iya.
Kang kinsa diay nang dagat? Kang kinsa man nang baybayon, titulado diay na? Nganong mamugos man kining mga dispatser diha sa Mar Beach nga paabangon ang tawo o pabayron sa parkingan bisan kadiyot ra kaayong motusmaw?
- Latest