EDITORYAL – Kaimportante sa dugo

Ang dugo makapasumpay sa kinabuhi sa pasyenteng nagkinahanglan, mao nga importante kaayo kini matag dunay tawong operahan  o kadtong nagkulang g dugo.

Mao nga kada tuig duna gyuy mga kalihokan sama sa bloodletting projects sa nagkadaiyang mga organisasyon, partikular niini ang Red Cross ug uban pa. Sagad ani boluntaryo nga gidonar sa mga tawo para makatabang sa ubang nagkinahanglan niini.

Matud pa makaayo sab sa panglawas sa tawo ang pagdonar kay mapulihan man og bag-ong dugo ang gidonar. Samtang ang dugo nga gidonar makasumpay pa sa kinabuhi sa pasyenteng makadawat niini.

Apan makahibulong lang kun nganong matag dunay magkinahanglan og dugo nga mga pasyente magkadiin-diin man og pangita ang mga tagtungod sa pasyente. Hain man diay ang mga gidonar nga dugo? Nagamit dayon tanan? Ang rason, walay pundong dugo ug kinahanglan nga mangita sila og donor, kun duna man, tagaliog sab ang presyo. Apan dili ingon niana kasayon ang pagpangita og donor og dugo.

Dunay mga donors nga baligya ang ilang dugo, dakong sukwahi sa tawag nga “donor” kay kun ibaligya dili na kini donasyon kondili produkto nga gibaligya sama sa medisina o tambal nga gikinahanglan sa pasyente.

Unya dili sab tanang tawo parehas og dugo, dunay mga tawong ang dugo pangitaon kaayo sama sa Type AB, Type A, Type B o ang Type O-negative nga sagad lang makita sa Latin America. Ang kumon nga dugo mao ang Type O –plus.

Samtang dili sab tanang donors, baligya man o libre ang dugong gitanyag ang makapasar  o dawaton sa mga doktor tungod kay kinahanglang pasado sila sa mga laboratory test kay kinahanglang parehas gyud kini sa dugo sa pasyente, bisan dunay gamay nga ligas dili irisgo sa mga doktor ang blood transfusion.

Mao nga importante gyud sa tanan nga ampingan ang lawas sa tanang oras. Dili abusaran aron dili maabot sa puntong kinahanglang operahan ug magkinahanglan og dugo.

Sa samang higayon, makatabang dayon sa mga kabanay o niadtong nagkinahanglan og dugo pinaagi sa pagdonar sa kaugalingong dugo aron masumpayan pa ilang kinabuhi nga di kinahanglang mogasto og dako ang pamilya.