Ipatigbabaw ang paghimaya sa Batang Hesus

Gisugdan kagahapong adlawa ang siyam ka adlaw nga nobenaryo alang sa kapistahan ni Senior Sto. Nino pinaagi usab sa gipahigayon nga Penitential Walk with Jesus gikan sa Fuente Osmeña agi sa Osmeña Boulevard hangtud na sa Basilica del Sto. Nino diin gisalmotan sa bagang duot sa mga deboto.

Malinawon sa kinatibuk-an ang kalihokan nga mao na usay naandan sa mga tawo nga tambongan ilabi na kadtong mga adunay panaad kada pangilin sa Balaang Bata.

Gawas pa karon nga hingpit na kitang nakalingkawas sa mga pagsuway mugna sa nahiaguman nato kaniadto nga pandemic ug wala nay babag sa atong pagpanglihok lihok.

Samtang gawas sa relihiyosong kalihokan, gitutokan usab karon ang kultoranhon nga mga aktibad nga mao ang Sinulog sa Sugbo Philippine 2024 diin gipahigayon niadtong nakalabay'ng adlaw ang send-off ceremony didto sa South Road Property kon SRP.

Adunay 3,500 ka mga tropa sa kagamhanan ang naglangkob sa Task Force Sinulog gikan sa Philippine National Police, Armed Forces of the Philippines, Philippine Coast Guard, Department of Health, Office of the Civil Defense ug ubang mga force multipliers. Sila ang magseguro sa kahapsay ug kalinaw sa tanang kalihokan.

Wala man kunoy hulga sa kalinaw nga nadawat ang atong mga otoridad apan dili gustong mokompyansa ang mga tinugyanan sa balaod busa gipadayon nila pagpatuman sa full alert status, lisod na kong malutsan busa kinahanglan gyud nga segurista nga mamonitor ang kalihokan sa tanan atol niining panahona.

Mismo si Mayor Mike Rama masaligon nga magmalinawon ang mga kalihokan sa Sinulog karong tuiga ug gani dili siya mosugot nga dunay signal shutdown kay matud niya jurassic na kini.

Ma-defeat ang katuyoan sa dakbayan nga mapakaylap sa tibuok kalibotang ang Sinulog nga giisip niini nga Mother of all Festivals.

Hinuon sa akong giingon, dili gyud angayan mokompiyansa aron gyud maseguro nga malinawon ug magmalamposon ang mga kalihokan nga gihalad alang sa Batang Hesus nga maoy nagprotehir kanato ug Iya na kining gipamatud-an sa daghang higayon nga Iya kitang gipanalipdan.

Aron makab-ot ang gitinguhang kahapsay ug kalinaw angayan nga ang hugot nga pag ampo ubanan usab sa buhat ug pagpaningkamot nga makab-ot kini. Viva Pit Senyor!