Enero 8, 2024: Piyesta sa pagbunyag sa atong Ginoo

Ang atong Ginoo sa wala pa niya sugdi ang iyang public ministry ang niadto kang Juan Magbubunyag aron siya magpabunyag.

Sa iyang paghaw-as gikan sa tubig nakita ang usa ka salampati nga nitugdon kaniya agig timailhan sa langitnong pagdason ingon nga pinili. Kuyog niini usab ang pagkadungog sa tingog nga  nag-ingon: "Kini ang pinangga kong anak paminaw kamo kaniya!"

Ang kinaiya sa bunyag ni Juan mahitungod man sa kabag-ohan. Si Jesus bisan walay sala ang niubog aron moambit sa atong pagkaalaot. Aron diha sa iyang pagka-Dios kita makaambit usab niini.

Nagpahinumdom kini nga ang matag usa kanato dunay bili ug dunay tumong.

Ang atong pagka binunyagan magdasig usab unta kanato nga atong panalipdan ang atong saad sa bunyag.

Isalikway nato ang sala ug palig-onon nato ang atong relasyon sa Ginoo nga mao ang kahulogan sa paghimo sa atong pagtuo nga mas molambo pa ug mohamtong. Amen!