EDITORYAL - Curfew sa mga minors

Pipila ka mga krimen ang natala sa kapolisan sa Sugbu nga naglambigit og mga menor de edad. Ang uban  niini bunga lang sa kainiton sa ulo ug nadala sa barkada nga wala sab maghunahuna sa implikasyon sa ilang gipanghimo.

Ang nagkadaiyang mga local government units dunay mga ordinansa bahin sa curfew sa mga menor de edad, apan subo lang nga wala kaayo kini maimplimentar.

Sa Cebu City dili palang dugay, dunay menor de edad nga gipusil patay ug laing usa sab ang naangol atol sa disko sa usa sa mga sitio sa Barangay Mabolo.

Ang suspek, menor de edad sab. Ang hinungdan, nasuya kini kay wala tagda sa grupo sa mga kaparehas nilang kabataang kababayen-an kay didto misagol sa grupo sa mga biktima.

Ingon niana kahuyang ang panghunahuna sa mga kabataan karon. Gamay nga problema padak-on tungod sa kakulang sa disiplina.

Usa sa mga hinungdan niini mao ang pagpabaya sa mga ginikanan. Mga ginikanan nga posibleng busy sa ilang panginabuhi o ba kaha wala lang gyud hatagi og pagtagad ang panghunahuna ug emosyon sa ilang mga anak.

Daghan ang nag-ingon nga nasobrahan na kalugak ang kabataan karon. Daghan kanila dili na halos mopatuo sa ilang mga ginikanan tungod kay ang ilang mga ginikanan wala naman sab magtagad sa ilang adlaw-adlaw nga kalihokan.

Kung ang mga ginikanan nagkulang sa pagdisiplina sa ilang mga anak nga ilaha rang pasagdan ug dili tultolon og hipos ilabi na panahon sa kagabhion, dako ang responsibilidad sa mga lokal nga kagamhanan nga korihian kini.

Aron kini epektibong mabuhat, kinahanglang iimplimentar ang mga lokal nga ordinansa aron mapugos ang mga ginikanan sa paghipos sa ilang mga anak.

 Aning paagiha, madisiplina sab ang mga kabataan ug samtang kini gihimo hinayhinay kining motuhop sa mga hunahuna sa mga batan-on hangtud nga ilaha na kining puy-an hangtud sa ilang pagdako.