Sirado na ang U-Turn slot sa SRP

Nalipay kaayo ko kay gimando na gyud ni Cebu City Mayor Michael Rama nga sirad-an ang U-Turn slot diha sa South Coastal Road dapit sa Il Curso kay mao ni ang makamugna og traffic.

Ang tinuod, dugay na kaayo ko nga nag-ingon nga ang pagbutang og U-Turn slot diha dapit sa Il Curso, gawas nga peligro sa aksidente, makamugna og traffic.

Lupig man ko kay bisan og sakop ko sa Traffic Management Committee (TMC) sa Dakbayan sa Sugbo, usa ra ang akong tingog.

Pero kanunay nakong gisuwat dinhi sa Renbor Patrol nga mas bentaha pa nga adto motuyok ang mga motorista ilawom sa bridge kay sa mo-U-Turn diha sa Il Curso.

Abi ninyo, tungod sa daghang motorista nga gustong mohimo’g U-turn diha sa Il Curso, ma-traffic na hinuon sila ug dugay kaayo nga makaliko.

Ako nga moderitso ra ug adto na mohimo og U-Turn ilawom sa bridge, makabalik ra dayon ug kataw-an ra nako ang mga motorista nga naghuwat nga makaliko diha sa U-Turn slot.

Nganong maka-traffic man ang pagbutang og U-Turn slot diha sa may Il Curso? Pasabton mo nako nga tinuod, four-lanes ang karsada paingon sa south direction.

Apan kay ang left-most lane nga dapit sa center island gigamit na man sa naglumbay nga sakyanan nga gustong mo-left turn, tulo na lang ang nahibilin.

Unya kay ang right-most lane, kun ang dapit sa labing daplin dapit sa tuo gihimo man nga motorcycle lane, sa ato pa duha na kang ang nahibilin para sa mga sakyanan. Pun-an pa sa ubang driver nga pwerteng hinaya mopadagan, aw traffic gyud.

Unya, kadtong mga sakyanan nga gikan sa south direction ug mopaingon sa Cebu City, mapugos man gyud pagpahinay kay giibanan man og usa ka lane ug tunga ang karsada, alang sa mga left-turning vehicles, sa ato pa mabalda na sab ang dagan sa mga sakyanan.

Mao kana nga karong gisirado na ang U-Turn slot diha sa Il Curso, makita nga haruhay na og gamay ang dagan sa trapiko.

Atol sa special miting namo sa Traffic Management Board kaniadtong Martes, gihatagan nako og ideya sila si CCTO head Raquel Arce nga apil sa maka-traffic ang mga sakyanan nga gikan sa Compania Maritima nga mosu’d sa viaduct.

Mag-ilogay ra man og su’d ang mga sakyanan kay wa man madestinohi og traffic enforcer dihang dapita, ilabi na sa panahon sa hapon, ug tungod niini makamugna gyud og traffic.

Maayo unta og maiban-ibanan ang problema sa trapiko diha sa South Coastal Road, kun dili pa man hingpit nga masulbad.