Bag-ong tuig, bag-ong kinabuhi

Niadtong Enero 1 gisaulog ang tulo ka mga kasaulogan. Ang New Year diha sa atong Civil Calendar, ang Solemnidad ni Maria Inahan sa Dios. Ug ang World Day of Peace.

Kining maong mga kasaulogan maoy nilangkob sa atong pagtikang sa tuig 2024 human nato talikdi ang tuig 2023.

Ang bulan sa Enero kun January gikan sa Latin nga ngalan nga Janus. Kining latin nga ngalan, ngalan man sa paganong diosdios nga si Janus.

Matud pa si Janus, dunay duha ka mga nawong. Ang unang nawong anaa sa luyo nga nisimbolo sa atong kagahapon nga mao ang 2023.

Ato kining balikon lantaw uban ang pagpamalandong aron atong matugkad ang mga dapit sa atong kinabuhi nga angayan natong palamboon.

Ug hingpit nga biyaan ang bisan unsang makapakgang sa atong paghamtong.

Ang laing nawong nga nag-atubang sa unahan mao kadtong panlantaw uban ang paglaum alang sa umaabot.

Kining maong paglauma ang pagaubanan gyud og mga pag-ampo nga ang Dios manalangin kanato. Seguro ang Dios ug sayud siya sa atong kinahanglanon bisan wala pa nato kini madawat.

Mao nga dili nato angayang iangkla ang atong kaugamaon diha sa bisan unsang matang sa patuo tuo.

Nindot pud usab kaayo nga atong sugdan ang tuig 2024 pinaagi sa Pagsaulog sa Pangilin ni Maria Inahan sa Dios (Theotokos).

Kining maong pagsaulog nagdapit kanato sa pag-awat sa iyang mga hiyas nga mao ang pagkamapamalandungon.

Nindot gyud nga ang tanang mga lihok pamalandongan gyud nato sa makadaghang higayon. Sama ni Maria Santisima nga nitipig ning tanan sulod sa iyang kasingkasing. 

Taliwala sa mga kabalaka ug kahingawa unta ang tuig 2024 magdala kanato sa tinuod nga kalinaw nga dili mahimong ihatag sa kalibutan kondili nagagikan sa Dios lamang.