Dayon, Pasko, sa among kasingkasing!

Kada Disyembre 25, saulogon nato ang pag-abot ug pagkahimugso sa Balaang Bata, kinsa nagdala og kaluwasan alang natong mga linalang nga nagpaulipon sa sala. Ug giunsa ba nato sa pagpangandam ang mga adlaw sa Adbiyento ug Misa de Gallo?         

Miadto ba kita sa kompisalan, gibuhos ang tanang sala, nangayog pasaylo sa Ginoo ug kita misaad nga dili na magpakasala pag-usab? Gitinggan na ba nato atong Nanay, igsuon, silingan, kauban sa trabaho ug mga kaparang sa politika, kinsa dugay na natong gibungolan?

Nakapangayo na ba kitag pasaylo sa mga inosenting nangabilanggo tungod sa atong pagsaksi og bakak? Nakat-on na ba kita sa paghigugma sa atong mga kaaway?

Matud pa sa usa ka pari, miawas sa simbahan ang sobra kadaghang nanimba sa alas 4:30 sa kaadlawon nga Misa de Gallo. Pero dihang mipaambit na siya sa iyang matulon-anong wali, subo palandungon, nga ubay-ubay ang nahikatulog sa ilang lingkoranan.

Hinuon, pag-abot sa yugto sa pagpangalawat, ang kaganinang nangatulog, mikaon sab sa lawas ni Kristo. Nakapanghugas kaha ang tanan sa ilang kalag ning ilang pag-apil sa Eyukaristihanong kombira? Gani, kadtong 5 sa 10 ka dalagang-abay nga nahikatulog sa pag-abot sa pamanhonon, kinsa nahutdag lana sa sulo tungod sa kakulang sa pagpangandam, wala man pasudla sa Ginoo bisan giunsa nilag tuktok ang pultahan?

Angay hinumdoman. Ang mga adlaw sa Adbiyento ug Misa de Gallo mao ang panahon sa pagpanglimpyo sa kinatibuk-ang nataran sulod sa atong kaugalingon ilabi na sa atong kasingkasing, agig pangandam sa Iyang pag-abot, sa Iyang pagkahimugso niining adlaw sa Pasko, diin nagdala Siyag pinaskohan nga mao ang kaluwasan natong mga makasasala.

Ug kadto lamang hingpit mibiya sa ilang sala ug wala na gyoy bisan gamayng buling sa sala nga nahabilin kanila, ang makadawat niini.

Sanglit, matag usa kanato, templo man sa Ginoo, pagkabulahan nilang nakapanglimpyo-hinlo sa ilang kalag ug tanlag pag-abot sa Batang Hesus. Kay nunot sa awit sa mga anghel, tugob sa kadasig nga mobukas sa malipayon nilang kasingkasing dungan ang pag-ingon: “Dayon, Pasko, sa among kasingkasing!” Diin, ang tinuorayng diwa ug kahulogan sa Pasko ilang natagamtaman.

Sa ngalan sa The Freeman Banat News Big Family, Malipayong Pasko kaninyong tanan namong mga suki!