EDITORYAL - Hakog nga mga drayber

Sobra na gyud kaayo ning kahakog sa mga pipila ka taxi drivers ilabi na karong Pasko. Pamintaha ba kini o tungod lang sa dakong panginahanglan karong umaabot nga kapaskohan?

Dunay mga mireklamo aning ilang modus nga passenger-sharing scheme nga diin ang mga pasaherong dili managkaila o dili pareho og destinasyon balingon og pasakay unya tagsa-tagsahon og hatud.

Ok ra tingali ni kun ang pasahero makabarato sa plite, mora lang og rate sa modern PUJ. Apan ang nahitabo, luoy kaayo ang kataposang mokanaug nga pasahero kay nalayo na siya nidako pa iyang bayronon.

Kaning panahon sa Pasko sagad sa mga pasaheroan ilabi na ang mga taksi magnihit gyud kay daghan kaayo ang pasahero. Apan kaning ubang taxi driver gustong hakupon ang tanang mopara nila aron modako og kita.

Hinuon dili man pud ni sila maninghad, mohangyo ra man sila sa pasaherong nakauna og sakay, kun mosugot ba silang dunay laing pasakyon o mosabay ilabi nak un pareho ra sila og direksyon.

Apan usahay maikog naman sab mobalibad ang uban, o ba kaha subay sa tawhanong katungod mosugot nalang o basin mahadlok nga ikasuko sa drayber kun di sila mosugot.

Unsaon nalang kun ang ka-share nga pasahero tulisan diay? Dili ba nisakay man og taksi kay nagdali, dili gusto og hasol, seguridad ug daghan pang rason nga gilikayan nilang masinati kun mosakay sila og jeepneys.

Ang LTO, LTFRB kinahanglan nga mosusi aning mga taksi matag karon ug unya.

Samtang ang mga pasahero nga mabiktima og sama niini, kinahanglan nga dili adto sa social media modangop, kinahanglan nga pormal silang mosang-at og reklamo diha sa mga hingtungdang ahensiya sa gobiyerno aron maaksyonan.

Usa niini ang pagkuha sa pangalan sa drayber sa taksi, plaka ug unsang orasa ug kun asa gikan ug asa ang destinasyon. Syaro og di pa gihapon mokihol ang LTO o LTFRB ana.