Dili mag FB Live panahon sa tactical operation sa mga otoridad

Malamposong nasulbad sa kapolisan sa dakbayan sa Sugbo, ilabi na sa mga sakop sa Police Station 10 kon Labangon Police Station, ang nahitabong pagpanglungkab sa usa ka pawnshop sa dalan Natalio Bacalso sa dakbayan sa Sugbo sulod lang sa hamubo nga panahon.

Na-trap sa mga police ang 25-anyos nga lalaking nisulod sa establisemento pasado alas tres sa kaadlawon human usab nakatawag kanila ang mga tawo sa kasikbit nga tindahan.

Armado ang lalaki kinsa nakakuha og armas sa sulod sa pawnshop ug nagdala usab kini og granada.

Human sa negosasyon malinawon nga nitahan sa mga otoridad ang suspek kinsa miangkon nga ubos sa impluwensya sa illegal nga drugas ug naghambin usab og problema sa pamilya maong nakahimo siya sa krimen. Pasakaan siya og tukmang kaso.

Taliwala sa nahitabo kagahapon, gisita sa Cebu City Police Office ang gipakitang taras sa pipila ka mga sakop sa media nga nag-live streaming sa social media samtang nagpadayon ang tactical operation nga dili gyud unta angayan nga himoon sa mabuot nga tigbalita.

Wala gyud makakat-on sa leksyon sa nahitabong hostage krisis didto sa Manila niadtong Agusto 2010 diin usa ka tourist bus nga adunay mga sakay nga mga turista gikan sa Hong Kong ang nangamatay apil na ang hostake taker nga usa ka retired serviceman.

Kahinumduman nga usa sa gibasol ang gihimong live streaming sa mga media outlet diin nakamonitor diay ang hostage taker sa telebisyon sulo sa bus. Busa nasayran niini ang lihok sa mga otoridad sa gawas nga nagpahigayon sa tactical operation.

Kini ang nataligam-an sa mga kauban nato sa buhat tungod seguro nga gustong makahatud og impormasyon sa katawhan ug mugna usab sa init nga kompetensiya seguro ug sa taas nga engagement sa social media kay ang ingon niini nga coverage halinon kaayo sa mga marities sa social media.

Dili gyud kini angayan mahitabo. Una ang suspek armado og pistola ug duna pay granada nga kong na-trigger kini ug gipabuto aw perting disgrasyaha, patay ang anaa sa dapit apil na ang mga tigbalita ug ang kapolisan.

Ugaling dunay cellphone ang suspek makabantay na hinoon kini sa kasikas sa gawas maong makapangadam unsa ang iyang pagabuhaton.

Sensitibo ang ingon niini nga binuhatan sa mga kauban nato sa buhat nga angayan gyud hinumduman kanunay. Standard operating procedure gyud nga dili mag live stream kong ang suspek nga gigukod pa sa kapolisan kay mao na hinuon kini ang mahimong hinungdan sa bulilyaso sa operasyon sa mga otoridad.