Suporta sa magtutudlo

Gilusad sa DepEd ang programang Public-Private Education Complementary Framework sa tuyo nga maluagan ang mga tulonghaan ug maghatag kahigayonan sa mga tinun-an sa publikong tulonghaan nga makakuha og susamang matang sa edukasyon nga anaa sa mga pribadong eskwelahan. Maanindot tingale ang tumong sa maong programa.  Apan dili nato hikalimtan nga dakong kabahin sa pag-uswag sa atong educational system ang kalidad sa mga magtutudlo ug sa kahingpit sa suporta nga ihatag kanila.  Wala sa mga tinun-an lamang ang suliran; anaa usab sa mga magtutudlo ang yawe sa kalambuan sa atong mga tulonghaan. Kumbatii!

“Violators will be shoot”

Alang kang Congressman Robert Ace Barbers, kinahanglan nga susihon sa mga awtoridad ang hinayhinay nga pag-pangsakop sa Pilipinas sa mga Chinese pinaagi sa pagpamalit og mga propreyidad dinhi sa nasud ginamit ang pinayuhot nga kwarta ug mga bogus nga dokumento.  Dili tiaw kining maong kasayuran nga gibutyag ni Congressman Barbers.  Angayan kining susihon ug pakgangon.  Kay basin sa kapulihay, dili lang simple nga paskin ang atong mabasa nga mag-ingon, “Chinese Property. No Trespassing.” Aduna pa gyud kini dugang nga warning nga mag-ingon, “Violators will be shoot.  Survivors will be shoot again.”  Madahaan!

“Joy to the world”

Giaprobahan ni Presidente Bongbong Marcos ang pagpanghatag of Service Recognition Incentve (SRI) nga mokabat og 20,000 ngadto sa mga kwalipikado’ng empleyado sa kagamhanan sa tuig 2023 ingon man ang paghatag og one-time gratuity pay nga P 5,000 ngadto sa mga Contract of Services ug mga JOs sa gobyerno.  Makalipay kining balitaa sa mga hingtungdan’g empleyado.  Sa mga walay trabaho, dayag nga minghoy ang ang ilang Pasko.  Ni’ng kahimtanga, mora’g mabati nato ang mga kawani sa gobyerno nga nag-awit og “Joy to the World” samtang ang uban naga-awit lang intawon og “Silent Night.”  Fezteleern!

Nagpahiyom kanunay

Giawhag sa SSS ang mga retiree-pensioners sa pagpahimulos sa ilang low-interest loan, ang Pension Loan Program (PLP), alang sa ilang mga pinansyal nga panginahanglan, inay mangutang ngadto sa mga loan sharks kinsa mopahamtang kanila og taas nga interest.  Kon buot ang SSS nga tabangan ang mga pensioners pinaagi sa maong programa, angay nila han-ayon ug ipasayon ang proseso ug menosan ang rekisitos sa pagpangutang.  Sa loan sharks, gihatagan tumang kasayon ang nangutang busa mas daghan ang modangop ngadto kanila. Kay matud pa bitaw, “Sa oras sa panginahanglan, ang tigpatanto (loan shark), anaa ra nagpahiyom sa imong ganghaan.”  Muleeng!

Gitam-ukan hinuo’g basura

Supak ang Chief of Mission sa Department of Foreign Affairs nga si Ma. Teresa Torres Almojuela sa panawagan nga tugotan ang International Criminal Court (ICC) sa pagsulod sa Pilipinas kay dili man huyang ang atong mga institusyon ug aduna man kita’y hustong mga proseso nga gitamod alang sa  pagdungog sa maong kaso.  Mora’g natumbok sa DFA official ang hustong rason.  Basin inay manglimpyo, magdala ug magsabwag hinoon ang ICC og basura sa atong nataran.  Wala unya kita’y kalainan sa sitwasyon nga, human mipa-dayon ug mipakaon sa iro sa silingan, gikalibangan hinoon niini ang atong panimalay.  Pagkatoytoy!