Cebu City Sports Center o SRP?

Pagkadali ra sa panahon hapit naman usab ang Sinulog nga nahimong kontrobersiyal sa niaging tuig tungod sa pagbalhin sa venue niini ngadto sa South Road Property kon SRP gikan sa naandan nga Cebu City Sports Center.

Kini ang nakaingon sa wala pagsinabtanay ni Mayor Mike Rama ug Governor Gwen Garcia ug ang nahitabo kaniadto murag masubli naman sad seguro.

Gibarogan sa gobernador ang iyang sugyot nga unta ibalik nalang sa naandan nga venue sa sports center ang Sinulog Grand Parade kay mao naman kini ang naandan ug mas luwas kini sa mga mosalmot ug labaw sa tanan mao naman kini ang naandan nga dapit saulogon ang kulturanhon nga kalihokan.

Kahinumduman nga nahimong kulbahinam kaniadto kong asa gyud himoon ang Sinulog kay wala pa man gyud maandam ang dapit, apan nahitabo gyud sa SRP dihang mora'g gi-magic sa kontraktor ang paghuman sa entablado ug sa tibuok dapit diin nagpasundayag ang mga contingents.

Ang mora'g basakan sa kalapokon nga venue nadali dali sa pagka espalto, maayo nalang kay giinit sa besperas ug adlaw na mismo sa Sinulog ug natigayon gyud ang Sinulog sa SRP. Pastilan kon wala pa duyogi sa panahon magkayamukat gyud unta kay dili man gyud mauga ang semento ug ang aspalto, maayo nalang kay giinit niadtong panahona.

Sa pagkahuman sa Sinulog 2023 hugot na nag baruganan sa mayor nga sa susamang venue gihapon himoon kini ug mas pabonggahon pa gani kay himoon nga Sinulog sa Pilipinas kuno inig ka tuig 2024. Abi nako og ang dapit sa SRP gipalambo na daan pinaagi sa paghuman sa trabaho aron dili na gyud masubli ang mga pagsaway kay usa ka tuig gyug pagpangandam. Pastilan mora'g bag-o pa man gisugdan sa pagtrabaho ang venue.

Hinoon anaa naman daan ang sementadong entablado apan ang palibot niini dako pa kaayong trabahoon. Gani ang mga pansayan nga gibutang gipangsagbot ug gipangtay-anan na nga wala mamintinar o wala gyud gani malimpyohi sukad sa niaging Sinulog kay dihang akong gisusi pastilan nalang gyud nahimo nang lapok ang hugaw sa tawo nga wala ma-flush.

Sa kataas sa panahon nganong wala man trabahoa ang dapit aron unta maandam ug dili masawayan. Hinuon naa pay usa ka buwan kapin nga maplantsa ang SRP kong dili na gyud mausab ang baruganan sa mayor nga ipadayon ang Sinulog sa SRP 2024.

Hatagan nato og kahigayonan si Mayor Rama sa paghukom asa man gyud kay isip amahan sa syudad siya man ang mohukom niini, depende lang kong maminaw siya sa mga sugyot o dili. Kaniadto bitaw nga gibarugan niya ang iyang desisyon nilampos ra man pud gihapon ang Sinulog 2023.