EDITORYAL - Magpabakuna kutob sa mahimo

Dunay daghang matang sa mga bakuna nga gidalit ang Department of Health ilabi na sa mga sakit-sakit nga makatakboy sa uban.

Apan ang katawhan anha lang makahinumdom og pagpabakuna batok sa mga sakit kun duna nay pandemiya. Kay kasagaran sa mga tawo busy na kaayo sa ilang kinabuhi ug ang ubang tungod sa trabaho.

Sa dihang nikatap sa ang coronavirus nga COVID-19, anha pa nakahinumdom ang tanan nga gikinahanglan gyud ang bakuna.

Gani karon, medyo nakat-on na ang mga tawo ilabi na ang mga ginikanan gikan sa leksyong gihatag sa Covid-19 pandemic. Daghan na ang nagpangutana bahin sa mga bakuna nga gitanyag sa gobiyerno ilabi na kadtong mga libre.

Nag-unang gikinahanglan sa kadaghanan kining bakuna kontra sa sakit nga daling makatakod sama sa pneumonia ug uban pang flu-like diseases nga may pagkaparehas sa Covid-19.

Ning bag-o, dunay usa ka matang sa pneumonia nga na-monitor ug natala ang DOH, kini ang  Mycoplasma pneumoniae o "walking pneumonia" nga sa unang pagbuto sa balita nakapahadlok gamay sa mga tawo.

Hinuon gipasalig sa DOH nga dili kini angay ika-panic sa publiko. Duna silay upat ka samang kaso nga natala apan silang tanan nangaayo na.

Giklaro sa presidente sa Philippine College of Physicians nga si Dr. Rontgene Solante dugay na kini nga sakit, apan karon panahona dali nalang maila dayon unsa nga matang sa pneumonia ang nakatakboy dili parehas kaniadto.

Importante lang gyud nga kadtong mga masakiton, senior citizens ug mga masuso protektahan pinaagi sa bakuna.

Dili na unta magpaabot pa ang mga tawo nga magka-pandemiya na sab ayha pa magpabakuna.

Kung naay libreng gitanyag ang DOH mas maayong pagpabakuna daan, kay mas maayong protektado daan nungka ang magpatambal.