Mga tinagsip nga opinion

Nakapasar sa 2023 nga BAR examinations ang gitumbok nga utok sa pagtulis sa Oro Sugbu nga nahimutang sa may dalan Colon sa Dakbayan sa Sugbo. Tungod niini, dili na siya magkaproblema sa pagpangita og abogado nga mangabogar sa kasong pagpanulis nga iyang giatubang kay abogado naman siya.

Ang dako lang nga pangutana, tugotan ba kaha siya sa Korte Suprema nga makapanompa sa iyang pagka abogado? Kun ugaling tugotan siya sa Korte Suprema nga makapanompa, tugotan ba pod kaha siya sa mga opisyal sa kapolisan dinhi sa dakbayan sa Sugbo nga makagawas sa prisohan aron makaadto sa kaulohan alang sa iyang pagpanompa sa pagka abogado. Kun ugaling tugotan siya nga makagawas sa prisohan aron molarga sa kaulohan alang sa iyang pagpanompa, kinsa man ang mogasto? Librehon ba niya sa plete ang mga polis nga mokuyog ug mobantay kaniya?

* * *

Gihukman na sa lokal nga kagamhanan ug sa nagsugyot sa Cebu Bus Rapid Transit (CBRT) ang pagguba sa duha ka skywalks nga anaa sa tungod sa Department of Health ug sa Cebu Normal University sa may dalan Osmena Boulevard sugod ugmang adlawa, Disyembre 8, 2023.

Mas maayo rapod nga gub-on na kining duha ka skywalks tungod kay magsakit lang ang atong dughan nga magtanaw niining duha ka proyekto nga nagkantidad og minilyon nga wala mapahimusli, ah este, napahimuslan diay sa mga adik nga sa nahisgotang skywalk naghingos, sa mga tawo nga nipungko niini kay mitubag sa sugo sa lawas ug gikatulgan sa mga tawo nga walay katulganan.

* * *

Naghikog ang usa ka manindahay human giingon nga giilisan og drayber sa iyang asawa. Naghigot sa iyang liog ang bana nga nagbitay na sa ilang pansayan.

Nadala lang seguro ang asawa sa ilang giingon nga ang driver sweet lover. Ambot lang!