Brainwashing ug indoctrination

Dunay mga organisasyon mismo sulod sa atong simbahan nga kun dili mabantayan mamahimong usa ka religious cult. Kini tungod kay duna silay mga pamaagi ug balansayon nga kadudahan dako uyamot.

Ang mga pangulo maoy mohimo niini aron sa ingon mamahimong makontrolar nila ang ilang mga sakop ug molihok segun sa ilang tuyo. Gitawag kini og brainwashing ug indoctrination.

Ilang kuhaon ang pagsalig ug pagtuo sa mga sakop ug kun makuha na, daw mga robot sila nga patuohon na lang og bisan unsa. Kabahin niini ang gitawag nilang Reading.

Ang matag sakop ila kunong basahon segun sa ilang discernment. ang discernment matud pa, gikan sa locution sa Espiritu Santo. Nga sa ato pa, bisan unsay ibungat sa elder pagaisipong mensahe kay lagi maoy hulhog sa Espiritu Santo ngadto sa elder.

Ang nakadaut niini mahimo silang mo akusar sa sala nga sa tinuoray wala gyud tawon buhata sa hingtungdan. Sama pananglit sa usa ka elder moingon ngadto sa hingtungdan:

“Nasuko nimo ang Mahal nga Birhen kay nagpakuha ka sa imong Gisabak!” o moingon: “Kabubut-on sa Dios nga mahimo kang pari! Ug uban pang mga pakigpulong o dili ba kaha tapos na ang kalibotan!”

Angayan kitang magmatngon tungod kay ang Dios dili mopadayag sa iyang kaugalingon sama niini. Dili aprobado kining maong pamaagi.

Dugang pa, asa naman diay ang atong kagawasan sa pagpili kun pre-determined na ang tanan? Bugtong Dios lamang ang makasabot kun kinsa kita. Walay katungod si bisan kinsa nga maoy magbuot sa atong ugma.

Salig sa Dios ug ampo kanunay kay mas nakaila siya kanato kaysa mga tawong nagpaaron nga mga gikunsaran apan sa kaulahian ilad lamang ang tanan. Dangop ngadto sa mga tawo nga makatabang gayud kanimo sa tinuoray ug dili ngadto mga tawo mopahimulos sa imong kahuyanan.