Kagamhanang lokal ang mipatuman

Gilusad sa Cebu Provincial Government ang “Sugbo Merkadong Barato” (SMB)

didto sa Talisay City Hall, diin ang mga kabos nga Cebuano makapalit og bugas nga

tag-P20 lang ang presyo matag kilo.  Gihatagan sa Probinsya sa Sugbo og

katumanan ang saad sa Presidente ug gipakita nga mahimo diay nga ang lokal nga

kagamhanan maoy mopatuman sa mga saad ug polisiya sa nasudnong kagamhanan.

 Hinaut nga magpadayon ang maong nga programa kay ginaingon man nga, “Ang

serbisyo publiko dili lamang paghimo sa gimbuhaton sa paaging tinud-anay ug

maayo.  Kinahanglan usab ang kompletong dedikasyon ngadto sa katawhan ug sa

nasud.” Muleeng!

ISALINDOT ANG PANAGBINGKIL

Agi og reaksyon sa giduso nga resolusyon sa mga kongresista nga sakop sa

Makabayan bloc nga nag-awhag sa Marcos administration nga mokooperar sa

imbestigasyon sa International Criminal Court (ICC), namahayag si Bise Presidente

Sara Duterte nga itugyan lang niya sa katawhan ang pag-analisar sa motibo sa

Kongreso. Dili na lang unta apil-apilon ang katawhan sa panagbangi sa mga politiko

kay serbisyo man ang ilang gikinahanglan. Human ang politiko mosaad panahon sa

eleksiyon, diin gamiton pa usahay ang Ginoo, hinaut nga ang kongreso mosalindot

sa partisan nga panagbingkil ug mopadayag og taas nga kapasidad sa

pagpangalagad.  Hinaut pa unta!

GIPUHONAN SA SUGAL

Segun sa re-assessment nga gibuhat sa DSWD sa 1,158,249 ka household

beneficiary sa Pantawid Pamilyang Pilipino Program (4Ps), aduna na’y 339,660 ka

mga household beneficiary nga ilang gi-reclassify nga anaa na sa level 3 o self-

sufficient.  Angay tingali ipasabot usab sa DSWD ngano nga 30% ra ang na-

reclassify nga self-sufficient.  Tinuod nga dako’g gikatabang ang 4Ps sa katawhan

apan sayod usab kita nga adunay daghang benepisyaryo nga ang ayuda gipuhonan

lang sa sugal o ba kaha gipalit og ilimnong makahubog.  Angayan repasohon sa

DSWD ang ilang polisiya aron dili mausik ang pundo sa gobyerno.  Fishkots!

MALANGAN PA GYUD

Malangan na usab ang pag-implementar sa Cebu Bus Rapid Transit (CBRT) tungod

kay wala una tugoti sa Cebu City Traffic Management Coordination Committee

(TMCC) ang hangyo sa contractor nga mo-instalar ug dugang board-up sa dalan N.

Bacalso Avenue. Naghiko-hiko ang TMCC paghatag sa pagtugot tungod kuno sa

kadaghang reklamo sa kalangan sa proyekto.  Dili kaha mosamot hinoon kadaghan

ang reklamo tungod ning pagmakuli sa TMCC?  Angayan hinumduman nga “Ang

paglangay-langay magbunga kanunay’g kadaut ug makaguba sa labing maanindot

nga desinyo o proyekto."   Fezteleern!

TURISMO ANG PAMAAGI

Sa labing unang higayon, gitugotan sa Pilipinas ang kalihokan’g turismo sa mga lugar

nga kontrolado niini diha gilalisan nga Spratly Island sulod sa South China Sea.  Ang

pito ka adlaw nga tour gihinganlan og Great Kalayaan Freedom Expedition. 

Gipasabot sa mga organizer nga dili kini agresibo nga lakang apan gituohan nga

makahatag kini’g balor sa atong pag-angkon sa maong lugar.  Maanindot kining

maong kalihokan ug angayan suportahan sa kagamhanan.  Inay magsige’g tiyabaw

nga bully ang China, mas maayo nga ipakita nato nga kita’y tag-iya sa lugar pinaagi sa

pagpahimulos niini.  Maylain pa!