Tuwaytuway, Fetus ug uban pa

Niadtong bata pa ko, didto mi puyo sa Guihing, Hagonoy, Davao del Sur. Dunay balay didto nga pinahimo intawon sa akong mga apohan nga sila Lolo Tinong ug Lola Delfina. Dunay mga gabii kaniadto nga maglisud ko tulog. Kini tungod kay dunay mga tingog nga akong nadungog particular dapit sa pansayan. Wala pa kaayo ko makasabot kun nganong nahitabo kadtong mag butanga. Apan sa akong pakisusi gibutangan diay diay to sa panday og mga tuwaytuway sa tawo sa masigkahaligi. Mao diay nga daghang mga panghitabo nga paranormal. Butang nga akong nasayran sa dihang nagsugod nako og tuon kalabot sa mga paranormal ug sa eksorsismo hangtud nga nahimo nakong pari ug eksorsista.

Kining tuwaytuway bukog nga nahimutang dapit sa tuhod natong mga tawo. Dunay mga tambalan nga mokuha niini gikan sa minteryo aron gamiton alang sa occult nga katuyoan. Sa akong nadunggan gikan sa akong inahan nga ang maong mga tuwaytuway gituyo og lubong sa tambalan aron ma secure ang balay gikan sa tanang matang sa kawatan. Makalibog kay unsay kawaton didtong balaya. Dili pud mi dato tawon excuse me! Mao nga hasol gyud kaayo tinuod.

Dili maayo nga ang mga patay ikuyog sa mga buhi. Bisan tuod kun bukog o kalabera na ang tawo angayan lamang nga hatagan nato kini og pagtahud sanglit Sagrado man ang lawas sa tawo. Nagtuo ko nga ang maong akto sa konsagrasyon maoy nakapadasig sa demonyo aron manghasi didto. Ang mga fetus nga nakuha kinahanglang ilubong sa minteryo ug dili sa mga tugkaran lamang. Tarungon kini og hipos ug kun mahimo panalanginan sa pari aron mapahimutang pagtarong ang nitaliwan.

Mas haom usab nga sa dili pa tukoron ang bisan unsang building panalanginan una daan ang building site ug dili kini gamitan og bisan unsang padugo ug palihi lihi.