Sakripisyo imbes nga serbisyo

Opisyal na nga magsugod karong Huwebes, Nobiyembre 30, ang termino sa bag-ong mga napili nga opisyal sa barangay.

Daghan hinuon nila nagsugod na og report sa barangay hall alang sa transition gawas niadtong mga nasublian sa katungdanan nga wala magkinahanglan og turnover.

Ug kun nakabantay mo, labi pa niadtong mga barangay nga dunay midaog nga bag-ong kapitan, apektado ang serbisyo sa basura ug uban pang batakang serbisyo.

Kini tungod kay ang ubang mga napildi nga kapitan sayong miabandonar sa ilang responsibilidad bisan wa pay turn over.

Kinsa man sad tinuoy ganahan pa moreport sa trabaho kun pildero sa miaging eleksiyon. Apan angayang hinumduman sa mga outgoing barangay officials nga duna silay responsibilidad nga humanon ang trabaho hangtud sa katapusang adlaw sa ilang termino.

Ang laing hinungdan nganong apektado ang serbisyo mao nga gipangtangtang na sa trabaho ang mga kawani nga iya sa outgoing administration.

Hinungdan nga bisan duna pay nahabilin sa ilang mga kontrata wala na sab mangreport sa trabaho ang mga kawani nga nahibawo nang daan nga sila hulipan sa mosunod nga administrasyon.

Dinhi ang problema tungod kay samtang dili pa makapahiluna ang mopuli mabalda gyud ang serbisyo.

Nakasabot ko nga sa politika dunay mga daghang tawo nga mautangan og kabubut-on. Kini maoy hinungdan nga sagad sa mga politiko magdala gyud og ilang kaugalingon nga mga tawo.

Apan dunay serbisyo nga angayang di sagulan sa politika. Usa niini ang serbisyo sa mga BHW kon Barangay Health Worker.

Importante ang papel sa mga BHW. Gani dako kaayo sila og gikatampo panahon sa pandemya.

Ang akong panghinaot sa mga bag-ong kapitan, ayaw intawn panaktak og BHW. Sa higayon nga inyo ning buhaton siguradong maapektohan ang inyong mga molupyo.

Di sayon ang pagpangita og BHW nga maantigo sa gimbuhaton tungod kay nagkinahanglan og igong panahon pagbansay-bansay nila.

Kun tangtangon sa mga kapitan ang BHW nga tinudlo sa ilang kontra magkinahanglan pa siya og taas nga panahon sa pagbansay sa mga tawo nga ilang ipuli.

Unsa may mahitabo sa serbisyo sa katawhan mentras mohimo sila sa pagbansay?

Ang mahitabo hinuon inay serbisyo, sakripisyo ang inyong ihatag sa publiko.