Nagbilin og suwat ang namatay labot sa iyang sinunod nga yuta

Dear Atty. Divine,

Duna mi yuta nga dunay balay nga sinunod namo sa among amahan nga namatay na niadtong 1988. Gusto namo kining ibaligya sa iyang ig-agaw nga naa ra pud magpuyo sa yuta. Biyudo ang among amahan ug duna siya'y duha ka anak sa pirmero niyang asawa. Duha pud kami nga mga anak sa ikaduha niyang asawa. Upat kami nga mga sumosunod sa yuta nga dunay balay. Apan ang usa namo ka igsoon sa unang asawa ni papa kay namatay na niadtong 2000. Didto siya nagpuyo ug namatay sa Mindanao ug talagsa ra kaming magkita niya sa buhi pa siya. Dunay gihatag ang ig-agaw sa among papa nga sulat kuno sa among igsoon nga namatay. Ang sulat nga penetsahan og December 12, 1995, nagkanayon nga iya daw ihatag ang katunga sa iyang bahin sa yuta ug balay ngadto sa ig-agaw ni papa nga maoy papaliton namo sa yuta. Unsaon namo pagkahibalo nga sulat ba gayod kini sa among namatay nga igsoon? Ug kun iyaha ba gayod nga pirma ang nakabutang sa sulat?Balido ba pud ang nakalatid sa iyang sulat nga iyang ihatag ang katunga sa iyang bahin sa yuta ug balay ngadto sa ig-agaw ni papa? Daghan salamat ug more power to your column and God bless! —Vic

Dear Vic,

Kun adunay tawo nga nakasaksi sa paghimo sa maong suwat sa imong igsuon nga namatay usa kana sa paagi sa pagsuta kun iya ba gyud kini. Laing paagi sa pagsuta kun genuine ba ang maong suwat mao ang pag-compare sa agi sa imong igsuon kun aduna siyay mga suwat nga nahibilin sa dihang buhi pa siya. Apan ang moprobar kun tinuod ba gyud kining maong suwat mao ang ig-agaw sa imong papa ug dili kamong mga heirs. Inyo siyang sultian nga tungod kay namatay na ang inyong papa ug dili ninyo ma verify kun unsa kini ka tinuod then way rason nga inyo kining tumanon. Samtang sa imong pangutana kun balido ba kining maong suwat nga naghatag sa iyang share, ang akong tubag niana depende. Basi sa atong balaod aduna kitay gitawag nga Holographic Will nga diin kini sinuwat lang sa kamot, penetsahan ug dunay pirma sa nag execute. Ang Korte ra gyud ang makadesisyon niana kun nakatuman ba sa rekisitos sa Holographic Will ang maong suwat. Kun gusto sa imong ig-agaw nga ipatuman kini then iyang ipa probate sa Korte ang maong Will ug mopresentar siya og mga testigo atol sa hearing nga mopamatuod nga sinuwat gyud kini sa imong igsuon nga namatay. Thank you and God Bless. Atty. Divine

Alang sa inyong pangutana, palihug lang sa pag email sa [email protected]  ug akong tubagon ang inyong pangutana pinaagi sa akong column matag Miyerkules, Sabado ug Domingo.