Pagpamalandong sa Malangkubong kaayohan

Mga timailhan sa yawan-ong pagbanhig kun pag-atake

1. Diha sa pagkatulog

Tuyo sa mga yawa nga hasulon gyud ang tawo bisan gani diha sa iyang pagpahulay kun paghikatulog  mao nga pinaagi sa yamyam ug tunglo nga gipasiugdahan sa mga instrumento sa kangitngit ang biktima dili makatulog o makapahuway og tarong.

Hinuon, dunay mga sirkumstansiya nga ang hinungdan natural gumikan sa mga gipanghambin nga balatian.

Mao nga dunay mga pildoras pagpakatulog. Hinuon kinahanglang mangayo gyud og panahom sa mga doctor. Ug kun walay alibyo mas makiangayon nga mokonsulta sa gitahasang eksorsista sa inyong diocese.

Sa laing bahin, diha sa atong paghikatulog labina gyud sa mga takna sama sa alas dose ngadto na sa alas tres sa kaadlawon mahimong mahitabo ang pag-atake diha sa atong paghikatulog.

Tinuod ang mga damgo simbolo sa atong mga pangandoy ug mga butang gikahadlokan apan dunay mga damgo nga diabolical ug kun dili matabang moresulta og sleep paralysis hangtud na urom nga usahay moresulta sa kamatayon. Sanglitanan niini ang incubus ug succubus attacks. Tumong sa yawa mao nga luyahon ug hutdon ang kusog sa biktima.

Kun luya ang lawas mamahimong luya pud ang panghunahuna. Ning paagiha mas dali na lang kaayo ang pagmanipulate sa biktima nga daw lisud kaayo sination ug makahasol gyud sa tinuoray.

Angayang himoon:

a.  Ampoa ang Prayer of Deliverance and Blessing of the Bedroom gikan sa Philippine Association of Catholic Exorcists. (PACE) ug ma search ra sa internet. Kun wala mo makakaplag pagpadala ling og direct message ning tagsulat.

b.  Benditahi ang mga higdaanan ginamit ang exorcised water ug sabligi ug exorcized salt ang mga kantong bahin sa lawak.

c.   Kun dunay exorcized oil (kinahanglan olive oil) mahimong ipahid sa porma sa krus sa mga pultahan, bungbong, mga furniture ug uban pa.

d.  Pag-ampo gyud sa kanunay sa dili pa matulog.

e.  Pagbasa og labakara una ginamit ang init init nga tubig nga imong ipahid sa imong ulo ug kalawasan. Kun dili ka makahimo niini pagsugo sa mga sakop sa pamilya nga mohimo sa ingon labina kun luya ka. Dayon ihumol ang maong labakara sa bugnaw nga tubig pila ka mimutos ang molabay ginamit ang mao lang gihapong proseso.

f.    Dili maayo nga magsige og pundo sa sulod sa lawak. Gawas ug pakighugoy hugoy sa mga tawo. Makasamot ang pagpunay og pundo sa sulod sa lawak. Gikinahanglan usab ang presko nga hangin.

g.  Pamasahe kun gikinahanglan.

h.  Inhale, exhale exercises pagpawala sa nasinati nga tensiyon. 

“Ubique Deus Est!” matud pa ni Padre Amorth. Nga sa ato pa bisan asa anaa ang Dios. Ang lawak katulganan sagrado ug gani matud pang San Hannibal Maria Di Francia ang lawak katulganan mao man ang ikaduhang kapilya mao nga tinguha sa pagpuyo sa kinabuhing balaan padayon gihapon didto sa sulod sa maong lawak.