Mga tampalasan  nga driver ug konduktor sa MPUJ

Nalambigit karon sa init nga isyu ang mga modern public utility jeepney tungod sa gilambigitan nga mga panghitabo nga adunay kalambigitan sa ilang pagpadagan sa karsada ug sa pag-handle nila sa mga pasahero. Dili man hinuon tanan ang adunay dili maayong taras apan anaa gyuy mga driver ug conductor nga tampalasan.

Ning bag-o lang usa ka MPUJ ang nadisgrasya dapit sa Barangay Basak dakbayan sa Mandaue human ni-overtake unta apan nabalintong kini nga misangpot sa pagkamatay sa usa pasahero ug pagkaangol sa lima ka mga sakay niini. Nangatarongan pa ang driver niini nga wala kuno niya tuyoa diin aksidente ra gyud ang nahitabo. Pastilan kong nagtan-aw pa lang unta siya sa safety sa iyang mga pasahero wala gyud untay mamatay o masakitan nga pasahero.

Una niini nag-viral ang usa ka MPUJ gihapon human gipadangat sa usa ka pasahero ngadto sa social media ang iyang experience sa kadautan og batasan sa conductor nga nimando kanila nga mosibog kay adunay laing pasahero nga gipasakay. Wala naman gyuy kasibogan kay perting huota na ang lingkoranan apan nag inirogante naman hinuon ang conductor og giingnan ang pasahero nga pwede kini monaug ug dili pud kuno siya mahadlok ireport sa LTO o LTFRB.

Makasabot man kita sa kahimtang sa mga MPUJ nga mag-apas sa ilang quota sa pasahero apan dakong sayop gyud ang pagpasakay sa sobra sa kapasidad sa ilang bus, labaw sa tanan nabutang sa peligro ang mga pasahero kong mag overloading kini.

Pipila lang kini sa mga panghitabo ug issue nga gilambigitan niining matang sa transport group apan duna pa gyud seguroy daghang reklamo batok sa mga nagmaneho ug nangundoktor nga wala lang mareport.

Puwera lang sa mga maayo og batasan, kining mga modern PUJ mga hari na sa karsada nga dili na gani mopadaplin kong mamik-ap ug mopakanaug sa ilang mga pasahero nga mosangpot sa pagkatanggong sa nagsunod nga mga sakyanan, mas delikado kong magkabangga na hinoon.

Gikatakdang ipatawag sa LTO ang mga drivers sa mosunod nga semana aron subling isilsil sa ilang alimpatakan ang insaktong road courtesy sa mga pasahero ug sa tanang mga tawo nga makasakay o ilang maagian aron malikay sa disgrasya.

Dili lang gani ang LTO kon dili moaksyon pud unta ang LTFRB aron maoy modesiplina sa mga operators sa sakyanan kinsa maoy estriktong mopatuman sa lagda ngadto sa mga drivers.

Unta seryoson niining mga ahensiya sa kagamhanan sa pagsilot niadtong mga tempalasan nga mga drivers ug conductor sa public transportation aron sila masampolan ug dili na gyud mousab ilang dautang taras sa karsada.