Walay kaso gikaso

Ang P125M-confidential fund (CF) nga gi-request ni Vice President Sara ‘Inday’ Z. Duterte-Carpio sa buhatan sa Department of Budget and Management (DBM) para sa iyang opisina, Office of the Vice President (OVP), Agosto 22, 2022 pa niya giaplayan. Ug diha na naaprobahan sa tungatungang bahin sa Disyembre 2022.

Nga sa ato pa, dugay kining gi-estudyohan sa hingtungdang kadagkoan sa DBM kon constitutional ba kini o dili, ayha pa aprobahi.

Kon ang naaprobahang 125M CF nagagikan man sa contingent funds sa Office of the President (OP) nga gibalhin ngadto sa OVP, sala ba diay kini ni Inday? Timan-i. Igo ra baya siyang mi-request. Ug DBM ang mi-approved. Unya, nganong siya man ang pakasad-on?

Ang obligasiyon ni Inday mao ra ang giunsa niya kini paggasto? Ug hangtod ning pagsulat, walay nakita ang Commission on Audit (COA) nga adunay iregularidad sa iyang kinatibuk-ang paggamit niini.

Subo palandungon, nga ning administrasiyong Marcos, giguba ni House Speaker Martin Romualdez ang orihinal BBM-SARA Uniteam nga gipondar nila ni Inday ug BBM.

Ug inay suportahan isip maoy ikaduhang kintas-ang lider sa nasod, diha sa iyang kawsa sa pagpalambo sa kahimtang sa katawhan ug atong nasud, daw nabalaka hinuon si Martin nga mapadayon ni Inday ang iyang exemplary performance, diin bisag takpan pa sa bisan unsang pagdaot sa Makabayan Bloc, pabiling molutaw ang kamabulokon.

Bisag walay nasupak si Inday sa paggamit-gasto sa OVP P125M-CF, nagsige gihapog putakputak ang mga anino sa kangitngit giunsa ug hain kini mopaingon? Unya wala pa matagbaw, miaplear-petisyon sa Korrte Suprema nga mahukmang unconstitutional ang nahisgotang CF aron makuhag balik ug mauli ngadto sa National Treasury.

Bisag nasumiter na sa OVP ang tanang lehitimong ebidensiya ngadto sa COA, ang mga anti-Sara morag irong mangtas, nagpunay'g paghot atubangan sa salamin, diin dili hitsura ni Inday maoy ilang nakita. Kondili, ilang kaugalingon binuhatan kang kansang kalang-og sa baho giablihan ni kanhi Presidente Tatay Digong. Nga maoy nakaparantar sa tanang hingtungdan!

Alang nako, walay gyoy kaso nga angay ipahamtang sa dalayegong gibuhat ni Inday. Ug ambot, ngano, nga imbes abagan siya sa atong mga magbabalaod sa Kongreso, gikasohan man hinuon siya nilang mipabor sa walhong grupo?

Are we, Filipinos, still safe?