EDITORYAL - Luwas nga biyahe

Nagdasok na og sugod ang mga terminal sa bus dinhi sa Sugbu, partikular ang Cebu South Bus Terminal ug ang Cebu North Bus Terminal tungod sa pagpamauli na sa mga tawo sa tagsa-tagsa nila ka lugar alang sa umaabot nga Kalag-Kalag ug ning umaabot piniliay sa barangay.

Ang Land Transportation Franchising and Regulatory Board mihimo na og inspeksyon sa nagkadaiyang terminal aron pagsusi kun luwas bang sakyan ang mga pasaheroan ug pagsiguro nga adunay paigong masakyang bus ang mga tawo pinaagi sa pag-isyu og special permits.

Para sa mga biyahidor, kung mahimo mas maayong mosayo og adto sa terminal aron dili maabtan sa pagdasok sa mga tawo ug usa pa, bugnaw pa ang panahon para sa biyahe ug aron sab sayo nga makaabot sa ilang destinasyon.

Mas labing maayo nga magdala nalang daan og tubig mainom ug snacks aron dili na kinahanglang magkarakara pagpangita niini tunga-tunga sa nagpunsisok nga mga pasahero diha sa mga terminal.

Kutob sa mahimo, dili na magdala og tagsa ka kabinet o tagsa ka maletang mga sapot o sinina aron dili maglisod og sakay.

Likayan unta, ilabi na sa mga edaran, mga mabdos ug kadtong adunay mga gidalang mga bata ang makigdinutdotay sa ubang pasahero ug dili mangyawat og sakay bisan puno na kaayo ang pasaheroan aron malikay sa disgrasya.

Kung ang tuyo bakasyon o mamauli sa ilang mga lungsod, dili na kinahanglang pangsul-obon ang mga mahalong alahas o dad-on tanang napundar gikan sa siyudad kay bato balani kini sa mga tulisan, kawatan ug mangunguot.

Magtimaan unta ang mga pasaheroan pagsunod sa luwas nga pagbiyahe pinaagi sa pagtuman  sa lagda sa trapiko sa tanang panahon ug likayan gyud ang overloading ug overspeeding kay mao kini sagad hinungdan sa disgrasya ug daghan ang maamong.

Samtang ang mga otoridad, dili lang unta kutob lang sa inspeksyon sa terminal ug mga bus ug magpakuha og hulagway ang ilang buhaton subay anang ilang mga “Oplan-Oplan.”

Maayo sab gyud unta kun diha mismo tungatunga sa mga karsada o sa rota aduna gyuy roadside check aron siguraduhong walay mangawat-kawat og overload.