Ikakatloag-Walo nga Adlaw Mga Sakramental: Ang balaang lana

Sukaranang Teksto

“Kun dunay masakiton kaninyo, ipatawag ang mga pangulo sa simbahan aron mag-ampo alang kaniya ug sa ngalan sa Ginoo magdihog kaniya og lana.

Ang maong pag-ampo nga inubanan sa pagtuo, makaayo sa masakiton ang Ginoo mopahiuli kaniya sa maayong panglawas ug mopasaylo sa iyang mga sala.”

Pasiuna

Tabunok sa kahulogan ang Lana diha sa atong pagtuong Katoliko. Nagsimbolo kini sa kasantos, kaayohan, kalig-on paghalad ingon man konsagrasyon. Gigamit kini sa mga naandang ritwal sa atong Simbahan gikan sa bunyag, kompirma, sagradong orden ug sa hilog sa mga masakiton.

Pagpalawom

Unsa man ang gitawag nilang Exorcised Oil?

Matud pa ni Padre Gabriel Amorth (RIP) kanhi chief exorcist sa Vaticano ang nahisgutang lana adunay gahum sa pagkuha sa bisan unsang giisip nga magical, makahilo gumikan sa occult ug magick nga pamaagi nga mahimong makasulod sa lawas sa biktima pinaagi sa pagkaon ug pag-inom.

Kun anaa ang pagduda mahimong gamiton kining maong lana (mas maayo lana sa olibo) nga isagol diha sa nilutong pagkaon.

Mahimo usab kining ipahid sa panit sa biktima nga nahiagom sa bisan unsang matang sa panlupig (oppression) gikan sa demonyo.

Pangamuyo

Akong gipangayo kang Kristo Jesus akong Ginoo diha sa iyang bililhon uyamot nga dugo

Nga iya akong panalipdan ingon man ang akong banay gikan sa mga dautang mga Espiritu, mga maligno, nga nihasi kanamo gikan sa among mga katigulangan hangtud sa kasamtangan. Sa ngalan sa Amahan, ug sa Anak ug sa Espiritu Santo. Amen.

Kalihokan karong adlawa

1. Himoang Batasan nga dihogan ang agtang sa exorcised oil sa porma sa krus.

2. Ang mga ginikanan makahimo niining maong ritwal ngadto sa ilang mga anak sa dili pa sila matulog o molakaw alang sa usa ka panaw.