EDITORYAL - Makapriso  ang pork

Nakombikto ug gisilotan nga mabilanggo gikan 66 ngadto sa 102 ka tuig ang negosyanteng si Janet Lim-Napoles.

Si Napoles gipasakaan og patong-patong nga kasong graft and malversation of public funds bahin sa matud pa P20.91 milyones nga Priority Development ssistance Fund (PDAF) o pork barrel ni kanhi South Cotabato Second District representative Arthur Pingoy Jr.

Ang Sandiganbayan Special Second Division miingon nga makaupat ka higayon nga guilty si Napoles sa paglapas sa Section 3 (e) of Republic Act 3019 or the Anti-Graft and Corrupt Practices Act ug laing upat gihapon ka higayon sa malversation of public funds ubos sa Article 2017 of the Revised Penal Code.

Gawas sa pagkabilanggo, gimandoan siya sa pag-uli sa P20.91 milyones ug dugang P20.91 milyones nga multa niya ug sa kaubanan pa niyang nakombikto sa kaso. Silang tanan dili na sab makahupot og bisan unsang posisyon sa gobiyerno. Ang mga kauban ni Napoles nga nakombikto mga opisyales sa mga bogus nga non-governmental organization nga maoy matud pa gibubuan o gitaganahan sa maong pork barrel.

Hinuon si Pinggoy naabswelto gumikan sa kakulang sa ebidensiya nga nalambigit siya sa pagwaldas sa maong pundo. Ang Korte Suprema daan ng mipagawas og pamahayag nga ang pork barrel fund nakalapas sa Konstitusyon.

Karong bag-o, nautingkay sab ang kabahin sa confidential and intelligence funds (CIFs) sa pipila ka mga buhatan, ahensiya ug departamento sa gobiyerno kay nahibaw-an nga ang ubang gigahinan og pundo niini dili mandato ang pagbantay sa seguridad sa nasud gikan sa mga kaaway niini.

Kani ra bang CIFs dili bastabasta ma-audit tungod sa paagi sa paggamit niini. Dili kaayo kini kutihon kun giunsa paggamit, busa makapaduda.

Kaning nahitabo kang Napoles ug sa mga kaubanan magsilbi untang leksyon sa tanang mga naa sa katungdanan. Ang pundo sa gobiyerno gamiton ra gyud sa husto ug dili waldason ug ibulsa sa pipila ka mga hakog nga mga indibidwal.

Walay aso nga makumkom kay sa kadugayan mogawas gyud kini ug mahibaw-an sa tanan.