Ikakatloag-Unom nga Adlaw

Ang mga Sakramental: Ang Balaang Asin

Sukaranang teksto

Basaha kining mosunod:

Lev. 2;13, 2 Cron. 13;5, Num. 18;19, Ezek. 43;24, Gen. 31;54

Pasiuna

Nabag-o ang kaikag sa katawhan karong mga panahona kalabot sa karaang sacramental nga mao ang balaang asin labina sa mga pangalagad alang sa kalingkawasan kun deliverance ministries ug sa mga sa charismatics. Makahuloganon kaayo kun atong himoon ang daklit nga pagtuon kalabot niini.

Pagpalawom

Mahal ang asin ug gani gigamit kini sa Ehipto ug sa Persia. Ang mga sundalo sa Roma kaniadto gibayran og  Sal  kun asin isip sweldo. Dinhi gikan ang pulong salary sa inglis nga pinulongan. Nagpasabot kini mahal gyud kaayo ang asin niadtong unang panahon ug bulahan ka kun anaa ka niini. Ug makatarunganon lamang nga kabahin kin sa mga halad alang sa Dios. Gituohan nga asin maka preserbar sa pagkaon ug duna kini magamit ingon nga tambal. Gigamit gani kini alang sa mga bag-ong nahimugso labina gyud sa paglikay sa infection niadtong mga masuso nga naputlan sa pusod. Sulod sa 3,500 ka tuig gigamit ang asin sa pagpreserbar sa mga karne. Diha sa mga ebanghelyo ang asin nisimbolo sa panaghigalaay nga naghatag ug kanindot diha sa panaghigalaay. Gigamit kini kaniadto sa bunyag ug kabahin sa pag-ampo sa eksorsimo alang kanila nga gibunyagan.

Sa ato pa, ang asin ingon nga sacramental nakatabang kanato aron mamahimo kitang ma preserbar gikan sa gahum sa kangitngit diha sa atong mga sala ug sa impluwensiya mismo sa demonyo. Ang gahum sa asin wala gyud sa asin mismo kondili sa gahum gikan ni Kristo Jesus pinaagi sa pag-ampo ug panalangin nga gihimo sa simbahan alang ning maong mga sacramental.

Iya sa Dios ang asin. Ang mga naghimo sa diwatahan ug mga halad ngadto sa mga Espiritu sa kinaiyahan kun mga elemento ang mohimo man sa paghalad nga dili mogamit og asin. Dugang pa, tawgon pa nila ang mga Espiritu sa kasadpan ug kun atong tutokan pag-ayo, ang mga Espiritu sa kasadpan mao man kadtong mga Espiritu sa kangitngit. Sukwahi sa sidlakan diin didto nisubang ang adlaw.

Pangamuyo

Nangamuyo kami nga pinaagi ning balaang asin ug ning balaang tubig, mapanalipdan kami batok sa gahum sa dautan. Bisan asa isablig kining asin ug tubig, papahawaa ang gahum sa dautan o Balaang Espiritu pun-a ang mga dapit diin nipahawa ang mga dautan. Amen.

Kalihukan karong adlawa

Himoang Batasan nga imong sabligan og balaang asin ang ug tubig ang mga lawak, nagkadaiyang mga suok sa balay diin ikaw nagpuyo.