Duna koy pangutana

Dear Atty. Divine,

Duna koy pangutana labot sa akong pag umangkon nga anaa magdako sa akong inahan. Ang papa sa bata akong igsuon ug nagbuwag sila sa inahan sa bata sa dihang 1-year old pa ang akong pag  umangkon. Milarga ang inahan sa gawas og nagtrabaho abroad samtang ang bata gibilin sa akong mama kay nanarbaho sab ang papa. Karon miuli ang inahan gikan sa  gawas ug naminyo na kini. Nakigsulti siya sa akong mama nga iyang kuhaon ang bata nga karon 5-years old na. Plano sa inahan nga petisyonan ang bata ug dad on sa  abroad. Ang akong pangutana kinsa ang mas dunay katungod nga mo custody sa bata? Daghang salamat.

Norma

* * *

Dear Norma,

Basi sa atong balaod kun ang bata illegitimate, ang inahan gyud ang adunay katungod nga mo-custody niini. Kini bisan pa kun ang lola ang nag-atiman sa bata. Busa kun kuhaon sa biological mother ang bata wa gyuy makapugong kaniya  gawas lang sa court order.  Ang maayo ninyong buhaton mao ang pagpakigsabot  nalang sa inahan nga hatagan og higayon ang bata nga makabisita sa iyang lola ug papa kun moari sila sa Pilipinas. Pasabta lang ang imong inahan nga ang maayong kaugmaon sa bata maoy inyong ikonsiderar  kay mas hayag man gyud iyang future kon tua siya sa abroad mo eskwela, so bisan tuod kon sakit sa imong mama nga mabuwag sa iyang apo apan mas maayo nga iya sad huna hunaon ang future sa iyang apo. Thank you and God bless.

Atty. Divine

Alang  sa inyong pangutana palihug lang sa pag- email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.