Ikakatloan nga adlaw

Dili Kasarangang Lihok sa Yawa: Kalinga (Obsession)

Sukaranang Teksto

Basaha ang 1 Pedro 5;8-9

Pasiuna

1. Nagpasabot kini nga dunay mga butang nga naghatag og kalinga sa hunahuna ug pagbati sa hingtungdan. Mga hunahuna sama sa paghikog, pagpasipala sa ngalan sa Dios ug ang mga Sala nga bisan unsaon pagkumpisal kini nagbalik balik sa gihapon.

2. Diha sa kumpisalan kun ang kompesor nakamatngon nga ang gikumpisal nga sala sa mao lang gihapong tawo mas makaayo nga himoon ang pag-ampo sa kalingkawasan alang sa maong hingtungdan. Mao kini ang sugyot ni San Alfonso de Ligouri.

3. Ang tawo nahimong nabilanggo sa iyang mga dautang tumong ug binuhatan. Maglisud siya paglingkawas gikan niini nga sa ato pa, nakaumol kini og adiksiyon sa hingtungdan.

Pagpalawom

Matud pang Padre Gabriel Amorth, sa iyang libro: An Exorcist explains the Demonic pp. 72-73:

1. Ang Kalinga nga iya sa Demonyo (Diabolic Obsession) usa man ka matang sa kahasol diha sa hunahuna ug pagbati sa biktima. Matang sa kahasol nga lisud kaayo buntogon ug balibaran.

2. Mga hunghong, panan-awon, kalibog ug ang mga hunahuna nga sa pagpakamatay ingon man ang paghimo og dautan ngadto sa uban.

3. Nahimo kining maong mga panan-awon ingon man mga hallucinations nga nahilansang sa hunahuna ug pagbati sa hingtungdan.

4. Wala kini piliong takna sa pag-atake bisan sa buntag, udto, hapon o gabii.

5. Bisan gani ang mga santos ang wala man makalingkawas sa maong matang sa pang-atake. Si Padre Pio pananglitan ang gipakitaan sa yawa ingon nga dako ug ngil-ad nga iro. Usahay ang yawa nagtakuban ingon nga espirituhanong giya kun spiritual director nga dunay linain nga pahimangno alang kang Padre Pio. Apan si Padre Pio ingon nga balaang tawo ang naantigo man nga mobasa sa maong Espiritu ug sayud siya nga kini dili gikan sa Ginoo.

Pahimangno

Aron mamahimong mas malangkubon ang kaayohan mahinungdanon usab ang tabang gikan sa mga eksperto sama pananglit sa mga psychiatrists aron pagtino kun kini sikolohikal ba nga problema o dili. Sa akong kasinatian dunay batan-ong babaye nga gidala ngari nako nasagpaan gani ko ato. Apan sa dihang gihatagan siya og tambal nga gikan sa akong higala nga psychiatrist nga si Dr. Rene Obra uban ang mga pag-ampo nahimong luwas ug maayo na siya  karon. Kinahanglang malangkubon ug balanse ang atong panlantaw ug pagsagubang niini.

Pangamuyo

Litaniya sa Kalingkawasan

Ginoo ko, gamhanan ikaw ug ikaw ang among Dios nga among Amahan. Nangamuyo  kami kanimo pinaagi sa pangama sa mga Arkanghel nga sila si Miguel, Rafael ug Gabriel. Alang sa kalingkawasan sa among mga kaigsuonan nga naulipon sa gahum sa kangitngit. Mga santos sa langit umari kamo sa pagtabang kanamo.

Gikan sa kagul-anan, kahasol ug kaguol

Tubag: Palingkawasa kami Ginoo

Gikan sa pagdumot, pakighilawas ug kasina

Gikan sa panghunahuna og selos, kasuko ug kamatayon

Gikan sa hunahuna sa paghikog ug aborsiyon

Sa tanang matang sa makasasalang sekswalidad

Gikan sa pagkabungkag sa among banay ug makadaut nga panaghigalaay

Gikan sa bisan unsang matang sa yamyam, barang, tunglo ug mga patuo tuo.

Pag-Ampo

Ginoo nagaingon ka: “Ang kalinaw Ibilin ko kaninyo ang akong kalinaw ihatag ko kaninyo. Itugot nga pinaagi sa pangaliya ni Santa Maria Birhen, makalingkawas unta kami gikan sa gahum sa kangitngit ug makatagamtam kami sa imong tinuod nga kalinaw. Kini among gipangayo pinaagi sa gamhanang ngalan ni Jesukristo among Ginoo. Amen.

Kalihukan Karong Adlawa

1. Himoang sentro ug unod sa imong hunahuna ang mga maayong mga butang ug dili ang mga negatibong mga butang ug panghitabo sama sa imong suliran ug kahuyangan. Hinumdomi, mas labaw si Kristo Jesus sa atong mga suliran!