Mikontra sa confidential fund kalaban ng bayan

Pagbasura sa confidential funds (CF) alang sa tuyig 2024 nga gihangyo sa Office of the Vice President (OVP), diin gamiton unta para sa seguridad sa mga kabataan nga nagtungha sa mga eskuylahang gihimong recruitment areas sa mga walhong grupo ug sa pagpadali pagpuo sa himalatyon nang puwersa sa New People Army, dili angay ikalipay nila ni Senador Risa Hontiveros, Makabayan Bloc House Representatives ug House Speaker Martin Romualdez. Ngano?

Tungod kay milampos man tuod sila sa ilang pagbabag sa nahisgotang CF, sa samang higayon nababagan sab nila ang dakong tinguha ni Vice President Sara ‘Inday’ Z. Duterte-Carpio pagprotehir sa seguridad sa tanang kabataan ug katawhan batok sa mga rebelde ug teroristang dili hadlok mopatay og mga inosenting kinabuhi. Mao nga kon sila nahimuot, ang nawong sa mga naalarma mikulismaot!

Unya, wala pa matagbaw, mao na poy giutingkay sa taga Makabayan Bloc ang kanhi minilyong confidential fund matag tuig niadtong mayor pa si Inday sa Davao City. Diin, ang pagka insurgency-free, druglords-free, disciplined civilians, cleanest and safest city ug ang pagkamauswagon sa maong siyudad maoy mga lehitimong resibo nga makatubag hain mopaingon ang gikuwestiyong CF? Diin, ang Commission On Audit (COA) sa ilang makuti nga pag-audit, walay nakitang iregularidad sa paggamit-gasto niini.

Mao nga sa pagpakigpulong ni Inday atubangan sa kapolisan atol sa 122nd Police Service Anniversary Celebration didto sa Caraga Police Regional Office, Butuan City sa miaging Oktubre 4, 2023, siya mipabuhagay:

“Makinig kayo sa lahat ng sinasabi sa palibot ninyo. At tandaan ninyo, kung sino man ang kumukontra sa confidential funds ay kumukontra sa kapayapaan. Kung sino ang kumukontra sa kapayapaan ay kalaban ng bayan.” Ug milanog ang masipang pinalakpakay.

Hisabtan sa kapolisan ang sentimentong mibuto sa dughan ni Inday human siya disarmahi sa 2024 CF sa Kongreso nga alang niya mahait hinigiban sa pagpuo sa mga walhon. Gani, napruyba na niya ang kaepektibo niinii didto sa Davao City. Ug nganong gihikaw man kini kaniya karon? Sakit kaayo tinuoray!

Busa, dili siya mabasol diha sa iyang pagpahinumdom-tulisok sa tanang hingtungdan: “Ang mikontra sa confidential funds mikontra sa kapayapaan. Ang mikontra sa kapayapaan kaaway sa bayan.” Haskang daghana sa nangaigo!