Pangataking gipakita klarong pangpahagba

Sa bulan sa Disyembre 2022 naaprobahan ang P125M confidential fund (CF) alang sa Office of the Vice President (OVP) nga nagagikan sa contingent fund sa Office of the President (OP), diin hamubo na lang ang mga adlaw sa paggamit niini. Sanglit kon dili magasto sa OVP, ibalik-uli man kini ngadto sa atong National Treasury. Ug delikadong mabalibaran na ang OVP sa sunod.

Isip advanced thinker, giandam na daan ni VP Inday ang kompleto ug tanang gikinahanglan aron dili mausik ang maong CF. Nagamit gyod niya ang 2022  P125M CF diha sa iyang pagprotehir sa mga estudyante ug kabataan nga dili ma-recruit sulod sa mga eskuylahan. Ug usab, sa iyang dakong tinguha nga puohon ang mga walhong grupo, anaa man kini sa kabukiran, Senado o Kongreso?

Apan makadismaya. Kay inay daygon ug suportahan si Inday sa iyang pagsalbar sa naatrasawong pag-release sa P125M CF aron kini dili masayang, gisaway hinuon siya sa mga taga Makabayan Bloc: House Representatives Raoul Manuel, France Castro ug Arlene Brosas ug uban pang kritiko, kinsa daw nangahadlok sa maong mga programa, diin sa panuni sa ilang tingog morag maoy gusto nilang ipagawas, nga si Inday korap ug dautang mangangalagad. Hasta, mayoridad sa Kongreso natakdan. Ubos sa pagpangamahan ni House Speaker Martin Roumualdez, gitangtang-salikway ang OVP CF para sa tuig 2024 nga dako untag ikatabang sa pagpangalagad ni Inday. Para asa ba diay ang Kongreso? Sa mga walhon?

Base sa gipakitang inadlaw'ng lihok ning mga politikoha, mabasa kinsa kanila ang nagtinguhang makig-atbang ni Inday pagka-Presidente sa Pilipinas pag-abot sa 2028 election? Ania sila: Martin Romualdez, Riza Hontiveros, Leni Robredo ug Raffy Tulfo. Mao nga dili ikatingala, sa direkta o indirektang paagi, sila naglumbaanay paglabay g malang-og lapok ngadto sa genuine-like-gold nga imahe ni Inday, kinsa kanunayng mipahinumdom sa tanang elected leaders nga ang matag adlaw, panahon sa ilang pagbuhos og makatagbaw'ng pagpangalagad ngadto sa katilingban, inay magpunay pagpangdaot sa ilang kaubanan.

Kining gihimo sa mga anti-Sara Duterte, tataw kaayong para pang-demolish o pangpahagba sa gisaludohang bantayog nga napondar niya sukad pa niadtong siyay mayor sa Davao City. Ug dinhi masuta kinsa ang matatag-tibay: si Inday, o ang mga oposisyong palaaway?

Atong atngan!