Salimbong sa kainutil

Mibahad si Justice Secretary Crispin Remulla nga ipa-contempt sa Department of Justice (DOJ) ang tulo ka mga vloggers nga miinterview ni kanhi Bureau of Corrections (BuCor) director nga si retired general Gerald Bantag.

Si Bantag gipangita sa mga awtoridad tungod sa mga warrant of arrest nga giluwatan sa korte didto sa Las Piñas ug Muntinlupa batok niya may kalambigitan sa mga kasong murder nga iyang giatubang.

Si Bantag maoy gitumbok nga utok pagpatay sa broadcaster nga si Percy Lapid niadtong October 3, 2022 ug sa binilanggo sa New Bilibid Prison nga si Cristito Palania Villamor, kinsa giingong maoy middleman sa pagbanhig patay sa broadcaster.

Sigun ni Remulla kalapasan ang gihimo sa tulo ka vloggers nga pag-interview inay dakpon o ba kaha ireport sa awtoridad si Bantag.

Kataw-anan hunahunaon nga mas natultulan pa sa mga vloggers ang nahimutangan ni Bantag kay sa DOJ. Giunsa man diay ni Remulla paggamit ang confidential fund or intelligence fund sa DOJ?

Basi sa 2023 national budget, ang DOJ dunay P27.9 billion nga budget diin P168 milyones niini ang confidential fund. Hain man diay ni gastoha ni Remulla nganong mas natultolan man sa mga vloggers ang gitagoan ni Bantag?

Dili intawon trabaho sa mga vloggers ang pagpanakop og wanted person. Ang gitahasan sa hukmanan niini silang mga awtoridad ug dili ang mga vloggers.

Kanus-a man nahimong krimin ang pagpanginterview og pinangita sa balaod? Di sab pagtabang sa mga wanted person ang pag-interview nila. Nganong ang mga vloggers man maoy pasanginlan ni Remulla sa iyang kainutil pagdakop ni Bantag?

Ayaw himoang salimbong ang mga vloggers sa kainutil sa DOJ pagdakop ni Bantag.

Kun buot ni Remulla makisayod sa tulo ka vloggers diin nila hikaplagi si Bantag mahimo nilang imbistogahon apan di silang kapugos niini nga mokoperar.

Sama nga di mapugos sa mga awtoridad ang mga sakop sa media nga motug-an sa ilang tinubdan sa mga sensitibo nga kasayuran gawas lang og kini naglambigit sa national security.

Hagit ni alang ni Remulla ug sa DOJ nga buhaton ang ilang trabaho pagpangita ni Bantag ug di magsalig sa mga vloggers.