Mga iro nabiktima ra diay sa mga judgemental marites

Apas sumpay kini sa akong lindog niadtong Lunes mahitungod sa lalaking nakaplagang patay didto sa dakbayan sa Talisay kansang kamatayon unang gipasangil sa mga iro niini. Gani gidali og dakop ang mga iro ug gitanggong didto sa dog pound.

Daan ko pa lagi nga inosente gyud ang mga iro ug nabiktima sila sa pagpamasangil sa mga marites sa sala nga wala nila mahimo. Namatud-an nga wala gyud silay sala human nigawas ang resulta sa paghiling ni Dr. Benjamin Lara sa patayng lawas sa senior citizen nga giatake diay sa kasingkasing maong nakabsan sa kinabuhi.

Nasuta nga walay agi sa pinaakan sa ngipon sa iro, aduna lang kunoy mga kinawrasan apan posibleng gisuwayan og tabang sa mga iro ang ilang amo aron maluwas. Kini ang kaso sa pagpamasangil nga mo-conclude dayon sa mga panghitabo ug binuhatan kini sa mga marites.

Ma tawo man o hayop mabiktima gyud sa mga judgemental nga mga tawo nga mohukom dayon, maayo nalang gani kay wala dayon gisentensiyahan og kamatayon ang mga iro gipaabot pa ang 14 ka adlaw ayha hukman ang ilang kapalaran.

Alang sa mga experto sa kinaiya sa mga hayop, dili gyud diay makahimo ang iro sa pagpatay sa tawo nga nagpakaon kaniya kay mao lagi kini ang loyal kaayo. Kani adunay mga panghitabo nga nagpakamatay ang mga iro aron lang maluwas ang ilang amo nga tawo.

Ang kaagi sa mga iro nakaani kini og pagtagad sa mga tawo ilabi na kadtong mga pet lovers kinsa gustong mosagop kanila. Kong naakusahan man sila, aduna usay mga tawo nga nagpakabana sa ilang kaayohan ug andam molaban ug modayon sa ilang pinuy-anan.