EDITORYAL - Kinahanglang “advance mag-isip”

Ang gobiyerno nangita og solusyon para masulbad kining problema sa trapiko. Usa sa ilang nahunahunaan mao kining Bus Rapid Transit dinhi sa Cebu City nga giingong magkonektar sab ngadto sa mga silingang siyudad sama sa Talisay City ug Mandaue City ug sa mga silingan pang kalungsoran.

Kaning BRT mag dekada na sa dihang unang nahunahunaan apan karon pang tuiga nasugdan. Sa maong mga katuigan nga nilabay giagwanta sa publiko ang grabeng traffic, pun-an pa aning mga transport strikes sa mga transport groups ug uban pa. Naarang-arang sa dihang nauso kining modernized jeepneys ug napun-an ang mga rota samtang nakuha-kuhaan gyud ang mga kagang-kagang nga tradisyonal nga pasaheroan diha sa karsada nga nakapuno sa problema sa traffic.

Apan karon nagkabarato naman ang mga sakyanan, mga motorsiklo ug duna nay mga electric bikes ug electric cars tungod sa kompetisyon sa mga dealers niini mao nga affordable na usab para sa uban ang pagpalit niini.

Ang pangutana karon, solusyon pa ba kaha gihapon kining BRT ini og makompleto na kini? Wala man mapun-i ang gidaghanon sa mga karsada o bisan gipangpalapdan ang kadaghanan sa mga karsada nga naa karon sa Metro Cebu. Kaning BRT ekslusibo ang agianan, naghuot na gani kaniadto sa wala pa kini, unsa nalang kaha kun kini mo-operate na? Kung dili wagtangon sa hingpit ang kagang-kagang nga tanang matang sa sakyanan nga nagdagan sa kadalan sa Sugbu, dili masulbad ang problema sa paghuot sa traffic.

Sanglitanan niini kanang nasinating traffic karon sa Osmeña Boulevard sa Cebut City halos sa tibuok adlaw panahon sa tingtrabaho ug tingklase, ang isi’g ka kilid nga tagsa ka lanes nalang maoy maagian sa mga sakyanan.

Ang Sugbu nagkinahanglan og mas moderno pang alternatibong transportasyon, dili BRT lang. Kinahanglan na kini maghunahuna sa umaabot nga sitwasyon 10 ka tuig gikan karon.Ang BRT mag napulo ka tuig nga gihisgutan, gitun-an, giplanohan ayha pa nasugdan og trabaho ning tuiga 2023 lang.

Mas maayong karon palang daan, magsugod na og himo og pagtuon ug sugdan dayon ang pagpatukod sa labing madaling panahon sa bag-ong alternatibong public transport system sama sa mono-rail, light rail, railway ug uban pa kay kini dugay sab mangahuman.