Wow mali!

Miadto sa buhatan sa kapolisan sa Minglanilla ang 61-anyos nga construction worker niadtong Lunes sa hapon aron unta paglukat og police clearance isip requirement sa iyang trabaho. Apan nabalhog hinoon sa prisohan si Salvador Tapic Paragoso human gidakop sa kapolisan tungod sa alias warrant maylabot sa usa ka kasong murder.

Ang alias warrant nga giluwatan sa korte niadtong Agosto 12, 2020 alang ni sa usa ka Salvador Tapic Paragoso, apan wala ibutang sa dokumento senior o junior ba ang akusado. Sanglit parehas man ang iyang ngalan sa napatik sa warrant of arrest gipusasan dayon sa kapolisan ang tiguwang sa way dugang pagsusi tinuod ba nga siya ang pinangita sa balaod.

Bisan giunsa pagpamalibad sa tiguwang nga di siya ang subject sa warrant kon dili ang iyang anak gibalhog gyud siya sa kapolisan sa bilanggoan. Matud sa kapolisan nga ilang itugyan sa korte ang tiguwang og bahala na ang hukmanan nga mosusi siya ba o dili ang gipangita sa balaod.

Lisod tinuod ning maong sitwasyon alang sa kapolisan. Apan kun gisusi lang nila og tarong ang background sa kaso sa wala pa sila magpaturagas og dakop ila untang masayran nga batan-on pa ang Salvador Tapic Paragoso nga nalambigit sa kaso ug imposibleng ang 61-anyos niyang amahan maoy subject sa alias warrant sanglit niadto pang tuig 2020 na isyu ang warrant.

Ambot giunsa pag-imbistigar sa kapolisan ang tiguwang nga wala man dayon sila masayod nga ang iyang anak maoy ilang gipangita ug dili siya.

Niadtong field reporter pa ko kadaghan ko makasaksi og nagkuha og clearance nga ni  hit  tungod kay duna silay pareha og ngalan nga dunay kaso.

Ang sagad gihimo sa National Bureau of Investigation (NBI) niini mao nga i-hold gyud ang aplikante ug sukitsukiton mahitungod sa kaso.

Ang imbistigador nga maantigo masayod pinaagi sa tinubagan sa aplikante iya ba o dili ang maong kaso. Kun masuta sa imbistigador nga imposible nga ang aplikante mao ang subject sa kaso pakuhaon ni nila og court clearance o ba kaha paluwaton og affidavit pagmatuod nga di siya ang nag-atubang og kaso.

Hinaut ma-improve sa kapolisan ang ilang paagi aron malikayan nga masubli ang ingon niini nga mga sitwasyon. Dili lalim sa usa ka tawo nga mabiktima sa wow mali  nga dakop sa kapolisan ug bilanggo sa kasong dili iya.