EDITORYAL - Nagmika ang mga barangay

Aron epektibo ug madisiplina gyud ang mga tawo bahin aning hustong paglabay sa basura ug pagsanta sa palunop sa baha matag mobunok ang uwan kinahanglang ang mangusog mao ang barangay, ikaduha nalang ang mayor ug konseho sa siyudad o munisipyo.

Kini tungod kay sila gyud maoy nasuhito sa ilang lugar, sila maoy nahibawo sa mga residente ug labaw sa tanan kinahanglan gyud nga tahuron sila sa ilang mga konstituwente isip mga tinugyanan sa otoridad diha sa ilang barangay.

Apan kinahanglan nga ilaha kining suportahan og mga programa, kampanya ug pundo aron ipamalit og gamit sa pagpanglimpyo ug paghipos sa basura ingon man sa mga sapa nga dili kinahanglang gikan sa siyudad o sa lungsod.

Tigsuporta nalang unta aron palapdan ang kampanya nga buhaton sa mga mayor aron nga maengganyo og maayo ang mga opisyal sa mga barangay.

Apan ang nahitabo karon, bale. Ang mga mayor maoy nangusog para molihok ang mga barangay officials, ang nakaparat lang kay ang mga barangay officials wala kaayoy natampo para madali ug magmalampuson ang gustong mahitabo sa ilang mga mayor.

Wala gani sila mamalit og mga epektibong gamit panglimpyo sa ilang mga kanal ug mga sapa.  Nag-agad ra sila sa Department of Public Service o Department of General Services, Department of Public Works and Highways, disaster office ug uban pa.

Mao nga makwestyon gyud kung seryuso ba gyud ang mga barangay officials nga masulbad ang problema baha ug basura sa ilang lugar.  Ang barangay duna gyud untay saktong mga gamit panglimpyo sa mga sapa, dili lang kanang kuhit-kuhit, silhig, sako ug uban pa.

Kinahanglan sila mamalit og dinghy o baroto para sakyan ini og limpyo sa mga sapa sa ilang hurisdiksyon ug labaw sa tanan hugtan nila ang pagbantay sa mga lugar ug mga sapa nga sagad labayan og basura sa mga tawo.

Padad-an og summon ang mga residente nga hugaw ang tugkaran ug dili manglimpyo. Hatagan og insentibo kadtong mga limpyado ug motuman sa mga ordinansa sa barangay. Kay bisan pila ka milyon pa ang gastuhon sa siyudad, lungsod o bisan ang nasudnong kagamhanan kung ini og human sa imprastraktura magmika ang barangay.