Ikanapulog-walo nga adlaw

Pito ka mga Ulohang Sala: Garbo Sukaranang Teksto

“Ang garbo mosangpot sa kalaglagan, mas maayo pa ang magmapaubsanon uban sa mga kabus kaysa pakig-ambit sa mga inagaw sa mga mapahitas-on.” (Pan. 16;18-19)

Pasiuna

1. Kining maong sala maoy kaatbang sa birtud sa pagpaubos.

2. Matud pang Sto. Tomas de Aquino kining maong sala maoy pinakakuyaw nga sala ni bisan kinsa. Hinumdomi ang mga anghel nahimong yawa gumikan sa garbo.

3. Kining maong sala maoy nakapahimo sa kadaghanan kanato nga mamahimong masinupakon sa Balaod nga gilatid.

Pagpalawom

1.  Ang tawong garboso nahigugma pag-ayo sa iyang kaugaingong katakus, bili ug gahum. Tungod ning dili makiangayong pagsalig sa kaugalingon nahimo siyang masinupakon sa iyang mga labaw, ubos og panlantaw sa mga susama niya. Buot niyang mamahimong mas molabaw pa kaysa uban.

2. Dako og kadaut sa kinabuhi sa tawo ang dili himsog nga garbo. Tungod ning maong garbo mamahimong ang kinabuhi ug kalambigitan usa ka kompetisyon kaysa pagtinabangay.

3. Ang garbo mahimong makapatukmod ni bisan kinsa sa pagsimba sa kaugalingong katakus kaysa paghunahuna sa mga gasa nga nahuptan sa uban. Sama ni Lucifer ang si bisan kinsang nabilanggo sa garbo ang magtuo nga mahimo niya ang tanang mga butang bisan walay Dios ni Relihiyon.

Pangamuyo

Amahan gikasilagan mo ang mga mapahitas-on. Hatagi ako sa imong grasya aron makalingkawas gikan niini. Sayud ako nga ang ikaw lamang ang bugtong akong gisaligan kay halayo kanimo wala man gyud akoy mahimo. Ikaw nga buhi ug hangtud sa kahangturan. Amen.

Kalihokan Karong Adlawa

Isipa ang imong kaugalingon ingon nga usa ka ulipon ug ang ulipon dili mamahimong molabaw pa kaysa iyang agalon. Himoa ang pinakaubos nga buhat sa pagpangalagad sa uban. Hikapa ang yuta nga imong gitumban. Wala kitay angay ipasigarbo kay sa yuta kita gikan ug sa yuta kita pauli.