EDITORYAL - Di coastal cleanup, coastal ‘selfies’ ang tuyo

Pagkanindot tan-awon niadtong adlaw nga Domingo ang kabaybayonan ug mga sapa nga dunay daghang mga tawong nanglimpyo. 

Kini tungod kay anang adlawa man ang selebrasyon sa National Coastal Cleanup Day dinhi sa Pilipinas nga pagabuhaton kada ikatulong Sabado sa bulan sa Septiyembre kada tuig.

Anang adlawa, mura og nakaginhawa ug miluag-luag ang naghuot sa basura ug lapok nga kabaybayonan ug mga kasapaan kay hawanan man kini ug habwaon.

Doble ang tumong niini mapanalipdan ang kadagatan ug kasapaan gikan sa polusyon sa basura. Ang Pilipinas ikatulo sa tibuok kalibotan sunod sa China (nag-unan) ug Indonesia (ikaduha) nga tigtambog og basurang plastic diha sa kadagatan.

Atol sa coastal cleanup kaliboang mga volunteers ang niduyog ug nitabang sa mga ahensiya sa gobiyerno nga nagpasiugda niini.

Apan sama sa mga unang coastal cleanups sa nanglabay nga mga buwan, mas daghan sa mga volunteers nga nanguban ang nag-usik lang sa oras pagkuyog kay inay nga mosungasong sa lapukong baybayon, adto ra sila sa layo kay nagpunay og pa selfie ug groupies pang social media.

Ang uban gud aning volunteers, ‘for compliance’ ra sa ilang kompanya o organisasyon para mahatagan  og insenti bo gikan sa LGUs samtang ang uban  para lang gyud dunay mga bag-ong pictures nga mabutang sa ilang calendar activities.

Tinuod daghan, pila ka sakong basura ang nahipos sa mga volunteers apan nasayod ang tanan nga ini og wala na sila sa dapit siguradong dunay basurang mopuli niining ilang mga nahipos.

Hangtud nga dili madisiplina ang mga tawo paghipos sa ilang basura ug dili magpataka og labay bisan asa, dili mawala kining mga basura sa kadagatan.

Sa pagkakaron, kanang mga pangandoy nga buhion og balik ang mga kasapaan sa Cebu City , kutob palang sa estorya.

Hangtud di mag-usab ang mga tawo ug kung walay political will ang mayor dili kini mahitabo ubos sa iyang administrasyon.

 Busa makapaabot pa gihapon kita og daghang mag “coastal selfies” sunod nga mga katuigan.