Daghan ang gigutom

Mokabat sa 783 ka milyon ka mga tawo sa tibuok kalibotan ang gipanggutom, mga tawo nga wala masayod makakaon pa ba sila. Kini nahitabo samtang nagkataas ang panginahanglan sa pagkaon apan nagkahubas ang pundo alang sa pagtabang niadtong gipanggutom. Mao kini ang gitugan sa pangulo sa United Nations food agency niadtong Septembre 14, 2023.

Si World Food Program (WFP) Executive Director Cindy McCain misulti sa United Nation Security Council nga tungod sa kakuwang sa pundo, ang ilang ahensiya napugos sa pagputol sa paghatag og rasyon alang sa milyones nga katawhan sa kalibotan.

Ang WFP mibana-bana ga dul-an 47 milyones ka tawo sa 50 ka nasud ang usa nalang ka lakang paingon sa kagutom ug 45 milyones ka mga bata nga nag edad ubos sa lima ka tuig ang gibana-bana nga nag antos sa grabing malnutrition.

Sa padayong pagbana-bana sa WFP sa 79 ka mga nasud mokabat ngadto sa 783 ka milyon ka mga tawo o usa sa 10 nga populasyon sa kalibotan ang matulog matag gabii nga walay kaon. Sobra sa 345 milyones ka mga tawo karon sa kalibotan ang nag atubang sa taas nga lebel sa walay kaseguroan sa pagkaon.

Dinhi sa Pilipinas, basi sa pagtuon nga gihimo sa Social Weather Stations niadtong Marso hangtod sa Hunyo ning tuig 2023, moabot ngadto sa 10.4 milyones ka pamilyang pinoy ang nakasinati og wala tuyoa nga kagutom.

Ang kagutom sa kalibotan mugna sa pag usab sa klima, kakabus, bangi ug malnutrisyon. Samtang dinhi sa Pilipinas ang WFP mitumbok sa usab-usab nga klima, dili patas nga katilingban ug dili patas nga pag apod-apod sa katigayonan.

Kay mao man kini ang hinungdan sa kagutom sa kalibotan ug sa nasud sa Pilipinas, masulbad na seguro kini sa mga utokan sa atong kagamhanan o ba kaha ila lang ning tutok-tutokan aron duna pa silay mapahimuslan matag higayon nga adunay piniliay.